Kuultinik Nuummi pinnersaasiortoq iluatsitsilluavippoq
- Kalaallit Nunaanni aatsitassanik tunngasunik suliffiusuni kisiartaallunga sinneqartoorfiusarpunga. Kuultinik pinnersaasiortartoq Nuummiittoq Palle Møller piaaraluni imminut taama ilisaritittarpoq.
Taanna kuultinik pinnersaasiassami isitassaanik ujaqqanik timaanukarluni ujaasisarpoq, nassaarsimariaraangamilu pinnersaasiarisarlugit.
Taassumalumi kuultiminersuaq - tassa guldbarre - Nalunami kuultisiorfimmeersoq pisiarigamiuk iluatsitsilluarsimaqaaq, kuultiminertarsuimmi tassanngaanneersut qaqutiguulersimaqimmata.
- Assorsuaq iluatsitsilluarsimaqaanga. Kuultimmi Kalaallit Nunaanneersut immikkut tuniniagaajunnaareeraluartut inuinnarmiit pisiarisinnaasimavara, Palle Møller oqarpoq.
Kuultiminertarsuimmi marluk pissarsiarsinnaasimavai, tamarmillu immikkut 300.000 koruuninik naleqartut Nuup qeqqani isumannaavillugit parnaarusimanerarlugit.
- Ilisimasakka naapertorlugit kuultiminertap Nalunameersup qanittumi pisiama saniatigut kuultiminertallu allap aamma Nalunameersup saniatigut allanik soqanngilaq, taakkulu maanna aningaaseriviup toqqorsisarfianiitippakka. Tassami pinnersaasiorfinniitiinnaraluarukkit tillinniarfigineqarnissara uaneralaarsuarmiileriaannaammat, Palle Møller oqarpoq.
Kuultilumi nunatsinneersoq pilerigineqartaqisoq ilisimaarilluarnerarpaa, tassami meeqqanik sulisoqarnani qallorneqarsimasuunera pissutaalluni pilerinarnerata saniatigut maani nunaqartut kuultimik namminneq nunaminneersumik pinnersaasianik pisinissaminnut kuussaanngillat. Kuultiminertarsuarmilli pisinissaq pinnersaasiortuaraalluni imaannaanngitsuuvoq, tassami ataasiinnaq 300.000 koruuninik naleqarmat.
- Kuultiminertaq pisiarisussanngorakku illugisara qularnaveeqqusiullugu aningaasanik atorniartariaqarsimavunga, taamaammallu aningaasanik tigoriaannarnik ullumikkut soqannginnama naammattusaariniaannaq inuuvunga, Palle Møller oqarpoq, kuultiminertarsuillu marluk kiilunik marlunnik oqimaassusillit ukiuni tulliuttuni arfineq pingasuni pinnersaaterpassualiarinissai naatsorsuutiginerarlugit.
Ukioq 2008-mi nunarsuarmi aningaasameerneq aallartimmalli kuultit akii qaffakkiartupiluulersimapput. Ullutsinnilu Nalunami kuulti qallorneqartoq kuultit nunarsuup sinneraneersunut akulerutiinnarneqartarluni.
