Kunngissaq nunatsinnut tikeraaqqittoq: Maaniilluni nuanneqaaq qiianarlunilu!

Immiussineq aqagu aallartissaaq.

Kunngissaq Københavnimiit Norsamut ikiartortoq assilisat videoliallu Facebookimi siammarterneqarput.

Ulloqeqqariitsiartorlu Nuummi mittarfimmiittoq KNR-ip naapippaa.

- Kalaallit Nunaannut tikeraaraangama nuannaartuaannarpunga, taanna oqarpoq.

- Naalagaaffeqatigiinneq pillugu isiginnaagassialiortussaavunga. Inuppassuit oqaloqatigisussaavakka assigiinngitsunullu pulaaqattaartussaallunga. Ullualuit maaniissaanga. Aallakaatitassiap imassaanut naammattumik immiussinissatta tungaanut.

Taanna DR peqatigalugu nunarput, Savalimmiut Danmarkillu pilugit piviusulersaarusiulerpoq. Immiussinissaraluit corona peqqutigalugu kinguartinneqarnikuupput. KNR-ip paasissutissiinera naapertorlugu kunngissaq, inuussutissanik nioqqutissiortunik, eqqumiitsuliortunik asimilu assigiinngitsunik inuussutissarsiortut naapissavai.

Piviusulersaarut DR-ikkut ukiup ingerlanerani takutinneqassaaq.

- Ukiut sisamat Kalaallit Nunaanniinngereerlunga tikeqqikkama nuannaaqaanga. Maaniilluni nuanneqaaq, assut nuannerpoq qiianarlunilu, taanna oqarpoq.

Nuummi sisorartartut peqatigiiffiat NSP innarluutilinnik sapaatiuppat sukkaniutsitsilerpat kunngissaq peqataassasoq, Sermitsiaq.ag allappoq.