Kunngissaq juullip nipitittagaanik uleersivoq

Ullumi Kalaallit Illuanni Københavnimiittumi inimi juullerpalaartumi juullip nipitittagaa, Camilla Nielsenimit qalipanneqartoq, juullip nipitittagaata aningaasaateqarfianut illersuisumit, kunngikkormiutut ataqqinassusilimmit, kunngissamit Frederimmit uleerneqarpoq - inuillu takuniaasut amerlapput.

Kunngisaq ukioq manna juullip nipitittagaa pillugu ima oqarpoq.

- Juullip nipitittagaa nuannaraara. Tassani takutinneqarpoq inunnut katersuuffiusoq, tassalu ulloriaq. Aamma kalaallit kiinaat qalipaatinik kialaartunik qalipanneqarsimasut takuneqarsinnaapput, kialaarnermik misigititsisuullutik, soorlu inimi imminut qanilluni issiaqatigiilluni, kunngissaq Frederik oqarpoq.

Kunngissap juullip nipitittagaata aningaasaateqarfianut illersuisuunini nuannaarutigaa - qungujulaarlunilu neriorsuisinnaannginnerarpoq nammineq juullip nipitittagaanik qalipaajumaarluni.

- Inuit nalunngilaat Kalaallit Nunaat, inui allallu tassunga attuumassuteqartut nuannarisorujussuugikka. Taamaattumik nuannaarutigaara anaananga paarlallugu juullip nipititaagaata aningaasaateqarfianut illersuisunngorsinnaagama. Neriorsuisinnaanngilangali juullip nipitittagaa tulleq titartarumaarlugu, kunngissaq Frederik oqarpoq.

Juullip Nipitittagaata aningaasaateqarfiani siulittaasoq, Steen Jepson oqarpoq neriulluni juullip nipitittagaa tunisaalluarumaartoq.

- Kunngissarput akuersinikuugami illersuisunngorniarluni siorna septemberimi, tamanna assut nuannaarutigisimavarput. Aamma nittarsaassiniarnitsinnut tunngatillugu assorujussuaq pingaruteqarsinnaagami kunngissap illersuisunngornera, Steen Jepson oqarpoq.

Erinarsoqatigiit Aavaat erinarsortuupput, erinarsortartorlu Julie Berthelsen ullormi oqalugiartussatut aggersagaasimasoq oqalugiartuuvoq.