Kunngissaq Frederik inuuissiortoorfigineqassaaq
Københavnimi Kalaallit Illuutaat ulloq aamma malunnartinniarpaat, inuuissiortoortoqassalluni, Kunngissallu arpannerani qiimmassaasoqassalluni.
Kunngissap arpalluni Købehavnep ilaaniittoq Sankt Thomas Plads, Frederiksbergimiittoq maajip ulluisa 21-anni sanioqqutileruniuk inuuissiortoortoqarlunilu qiimmassaasoqassaaq:
- Kunngissap Kalaallit Nunaannik asanninnera Kalaallit Nunaallu pillugu pimoorussinera qujamasuutigaarput, tamannalu takutinniarparput, qularutiginngilarpullu tamanna nuannariumaaraa, Københavnimi Kalaallit Illuutaanni pisortaq Leise Johnsen oqarpoq.
Royal Runimik taallugu Københavnimi maajip ulluisa 21-anni arpannermi 10 kilometeritut isortartutigisumik arpattoqassaaq, qiimmassaasullu Nunatsinneersut Købennhavnimi Sankt Thomas Pladsimi inissisimassallutik.
Qiimmassaasut erlasulisassapput, erinarsoqatigiillu Mik aamma Aavaat inuuissiortuussallutik.
Illoqarfiit Danmarkimi arpaffiusussat tassaapput Aalborg, Aarhus, Esbjerg, Odense kiisalu København. Københavnimi arpaffissaq 10 kilometerinik isortartutigaaq, illoqarfiit sinnerini 1,6 kilometeriussalluni.
Royal Runimik taallugu Nunatsinni aamma arpattoqassaaq. Kommuneqarfik Sermersooq Nuummi arpatsitsissaaq, ilaqutariit kunngissap inuuissiornera nalliussiniarlugu arpaqataasinnaapput, isorartussuserlu 3,5 kilometeriussalluni.