Kunngissaq Frederik: Immaqa Elvis-imik ateqassaaq

Maani nalunaaqutarput naapertorlugu ullaaq arfineq marlunut qiteqquttoq, kunngissap nulia ernertaarpoq nalunaaquttallu akunnerata affaa qaangiuttoq panissaarluni.

Anaananngorlaaq marlulissallu tamarmik ajunngitsut nalunaarutigineqarpoq.

- Misigisaq angeqaaq nuanneqalunilu, tamanna tupinnartuliaavoq - marloriaammik, kunngissaq marlulissanut, nukappiaqqamut niviarsiaqqamullu ataatanngoqqammersoq Ritzauimut taama oqarpoq.

Prins Henrik siulliulluni marlulissanik takuniaasuuvoq.

- Oqiliallattorujussuuvunga nuannaarlungalu, prins Henrik oqarpoq, angajoqqaanngortulli paarsisussamittut naatsorsuutigissanngikkaanni oqaatigalugu.

- Paarsisussatut piukkunnganngilanga, prins Henrik Ritzauimut oqarpoq.

Kingunitsianngua Dronning Margrethe poortugannguamik nassarluni takkuppoq.

- Ukuara meerartaavilu takujuminartorujussuupput, dronning Margrethe nalunaaquttap akunnerani ataatsimi pulaareerluni tusagassiortunut oqarpoq.

Kunngikkormiut inunngortut taakku marluk tusaamasarsuup allap inuuiani inunngorput, tassami Elvis Presley suli inuusuuguni ullumi inuuissiortussaagaluarmat. Kunngissarlu quiasaarluni oqarpoq, ernertaani immaqa Elvis-imik ateqassasoq.