Kunngissaq Folketingip ammaanersiornerani ilaqutariinni pisut pillugit oqaaseqanngitsoq

Kunngissaq Frederik ministeriunerup ammaanersiornermi oqalugiarneranik isiginnaareerluni Christiansborgip saani prins Joachimip meeraasa taaguutaannik arsaarineq pillugu apeqquteqarfigineqarami akissuteqanngilaq.

Kunngikkormiut tassa dronning Margrethe, prinsesse Benedikte aamma kunngissakkut ataatsimoorlutik Christiansborgimut apuupput. Tamanna Folketingip ammaanersiorneranut atatillugu pivoq.

AAMMA ATUARUK Prins Joachimip meeraasa prinsessetut prinsitullu taaguutitik annaagaat

Kunngikkormiut Folketingip siulittaasoqatigiivinik Christiansborgip saani ilassinninneranni kunngissaq Frederik qatanngutini oqaloqatigisimaneraa tusagassiortunik arlalinnik aperineqarpoq.

Kunngissap apeqqut ammaanermi oqalugiarneq sioqqullugu kingornaluunniit akissuteqarfiginngilaa. Kunngikkormiut sinneri aamma akissuteqanngillat.

Kunngikkormiutut taaguutit atorunnaassagaat

Prins Joachimip meeraasa kunngikkormiutut prinsitut prinsessetullu taaguutitik ukiumit nutaamit atorunnaassagaat, Dronning Margrethep sapaatip akunnerata siuliani pingasunngornermi nalunaarutigaa.

Kunngissaq kunngikkormiuni ilaqutariinni kisiartaalluni aalajangiinermut atatillugu tusagassiuutinut suli oqaaseqanngilaq. Prins Joachimip taaguutinik arsaarineq nuannarinagu oqaaseqarfigereerpaa.

Taanna aalajangiinermi ullormi tassani Ekstra Bladetimit apersorneqarami aalajangiineq meeqqaminut ajortumeerinerunerarpaa.

Dronningi ajuusaartoq kisianni aalajangiusimasoq

Dronning Margrethep aalajangiineq tamatuma kingorna ajuusaarutigaa, aalajangiineq aalajangiusimaannarlugu. Prins Joachimip pisumit qanoq sunnertitsiginissaa minnerusutut takorloorsimallugu ataasinngornermi nalunaarutigaa.

- Dronningitut, anaanatut, aanaatullu aalangiivunga, kisianni anaanatut aanaatullu ernerma nukarliup ilaqutaasalu qanoq sunnertitsiginissaa minnerusumik takorloorsimavara.

AAMMA ATUARUK Prins Joachim: Anaanama oqaloqatiginiarsimanngilaatigulluunnniit

Prins Joachimip meeraasa sisamat Monpezatimit grevitut komtessetullu taaguutit atuinnassagaat.

Pineqartut tassaapput prins Joachimip grevinde Alexandrallu ataatsimut meeraat Nikolai 23-nik ukiulik, Felix 20-nik ukiulik aamma prins Joachimip prinsesse Marielu meeraat Henrik 13-inik ukiulik kiisalu Athena qulinik ukiulik.

Kunngikkormiut taaguutaannik atorunnaarsitsinissamut aalajangiineq dronningip meeqqat nammineq inuunerminnik ilusilersuisinnaaanerulernissaannik kissaateqarnerminik tunngavilersorpaa.