ASSIT Kunngissaq ACR-imullu peqataasut allat aallarluarput
Ullaap tungaa nalunaaqutaq qulinut Arctic Circle Race-t 20-ssaat Sisimiuni aallartinneqarpoq, peqataasut 231-it – taakunannga kunngissaq Frederik ilaavoq – seqinnarissuarmi, anoraalaartumi qulinillu issittumi aallartinneqarput.
Allattoq Camilla Dam
apriilip 01-at 2016 14:18
Ataatsimut isigalugu nalliuttorsiorluni unammineq aallartilluarpoq.
Ulluni pingasuni unamminermut peqataasut nunanit 16-ineersuupput – Kalaallit Nunaat, Danmark, Sverige, Norge, Savalimmiut, Australia, Canada, USA, Letland, Østrig, Tyskland, Estland, Schweiz, Tuluit Nunaat.
Ujakkaarlutik unammiat 160 kilometerisut 100 kilometerisulluunniit isorartutigisumik ullut pingasut ingerlaneranni arpassapput, ullullu ingerlanerinni namminneq nerisatik, atortutik sisoraatitillu isumagissavaat.
Unammeqataasut aatsaat taama amerlatigipput, ikiuuttullu 235-it taakkunannga amerlanersaat kajumissutsiminnik ikiuuttut unamminerup ajunngitsumik ingerlanissaa isumagissavaat.
Angusat unamminerup ingerlanerani apiuuttut ugguuna malinnaaffigisinnaavatit.
