Kunngissap timersornerunissaq kaammattuutigaa

Nalunaaqutaq aqqaneq qaangilaaraa Kunngissaq Frederik Nuup mittarfianut tikippoq ingerlaannarlu sisorarfimmiissinnarluni timersortarfissuarmut Inussivimmut ingerlalluni. Suliniut "Maajimi peqqissuusa" ammarmat pingaarnertut Kunngissaq Frederik inuttaavoq aammalu suliniut pillugu oqaaseqatsiarluni.

- Assut aallartilluarpoq neriuppunga aamma malittarineqarluarumaartut qaammatip tulliuttup ingerlanerani pisussarpassuit, Kunngissaq Frederik KNRimut taama oqarpoq.

- Timip aalatittarnera peqqinnartuuvoq aamma pingaarpoq naqqaniit meeqqat inuusuttullu aallartiffigalugit suliniutip ingerlanissaq, Kunngissaq Frederik taama oqarpoq..

Meeqqat 500-ut sinneqartut sisorarfimmiipput inersimasorpassuillu aamma najuuteqataapput Kunngissamik tikilluaqqusiartorlutik. Nuummullu tikissimatsiaannarluni sisoraaserpoq marlussoriarlunilu Quassussuarmi sisulluni, meeqqat inersimasullu qungujulaqalutik kunngikkormiumik sisorartumik isiginnaartut assatik ersaartaattarniarlugit.

Tassanngaanniit Inussivimmukarpoq meerarpassuit tassani sammisaqartinneqarmata. Kunngissap Frederiup qaqiffissiaaqqamut qaqilluni meeqqat kissasseqatigai. Taamaasioreerami stafetimi unammisut aallartilersut ikiorpai. Suliani naammassigamiuk erngerluni aallariartorpoq.

- Maaniilluni nuanneqaaq aammalu maaniilluni nuannertuaannarpoq sila qanorikkaluaraangalluunniit. Nalunartuaannarpormi sila qanoq isissanersoq. Taamaakkaluartut inuit nuannaartut eqqanniittuaannarput tamatigullu misigisaq imaannaaneq ajorpoq, Kunngissaq Frederik taama oqarpoq.