Kunngissap nuliata Maryp meeqqat Schweizimut ilagissagai
Kunngissap nuliatalu meeraat sisamat nunanit tamalaaneersunut atuarfimmi Schweizimiittumi Lemania-Verbierimi 2020-p aallartinneranit sapaatini akunnerni aqqaneq-marlunni atuassapput.
Kunngikkormiut meerartaat Schweizimut aappaagu atuarialaassasut pingasunngormat saqqummersinneqareersorlu kunngikkormiut taama paasissutissiipput.
Kunngissap nulia, Mary meeqqatik sisamat tassalu prins Christian 13-inik ukiulik, prinsesse Isabella aqqaneq-marlunnik ukiulik kiisalu marlulissat prins Vincent aamma prinsesse Josephine arfineq-pingasunik ukioqartut ilagalugit Schweizimiinnerussaaq,
Taamaammat Mary pisortatigoortumik suliaqannginnerussaaq. Kunngissap Frederiup ilaquttani “suliassami avataatigut periarfissaqaraangami” ilagisassavai.
AAMMA ATUARUK Kunngissakkut meeraat Schweizimi atuassasut
Kunngissap nuliata Maryp meeqqat atuariarnissaat meeqqanut tunissutitut isigalugu TV2-mut pingasunngormat oqaatigaa.
- Meeqqatsinnut tunissutitut isigaara, tassani ataatsimoorfinnaapput, tunissullu taanna inuunermi sinnera pigissavaat, kunngissap nulia TV2-mut oqarpoq.
Kunngissaq Frankrigimi atuarnikuusoq
Kunngissap nuliatalu meeraat Schweizimi atuareerunik Københavnip qanittuani Gentoftemi Tranegårdsskolemi atuarnertik nangissavaat.
Kunngissaq Frederik nunami allani aamma atuarnikuuvoq.
Kunngissaq Frankrigimi École des Rochesimi 1982-imit 1983-imut atuarfiutigaluni ineqarfiusumi atuartuunikuuvoq. Tassanilu nukkani prins Joachim ilagalugu.
Prins Joachim prinsesse Marielu maanna Parisimi najugaqarput, prinsilu franskit sakkutuuini pisortatut atuarluni.
Tamatumunnga atatillugu aappartiit meeraat, prins Henrik aamma prinsesse Athena Parisimi atuarfimmi atuarput.
