- Oqarniarpugut: ´Tikilluarit´.

Københavnimi sapaatiuppat kunnginngortitsisoqalerpat ingerlaaqatigiinnissamik aaqqissuisoq Poul Johansen taama oqarpoq.

Taassuma Danmarkimi innuttaasut nunatsinnut attuumassutillit Københavnimi Kalaallit Illutaanni Danmarkimi nalunaaqutaq ullup-qeqqanut naapinnissamut kajumissaarlugit Kalaallit Illuutaata facebookianut innersuussivoq.

- Kunnginngortitsinissaq akunnialunnik sioqqullugu Kalaallit Illuutaanni kaffisoqatigiilaarnissaq kaagisoqatigiinnissarlu aqutsisut akuerereerpaat, assuutillillu assukkersorumaarput, Poul Johansen oqarpoq.

- Aammali peqataaginnartoqarsinnaavoq, taanna oqarpoq.

Christiansborg Slotspladsimi Dronning Margrethe pisortatigoortumik tunuarluni kunngissaq Frederik kunnginngortissavaa, kunnginngortitsiffissamullu ingerlaaqatigiinnissaq nal. 13.30 aallartissaaq.

Ministeriuneq Mette Frederiksen (S) illussaarsuup aneersuartarfianiit danskit nalunaaqutaat naapertorlugu nal. 15.00 nalunaaruteqassaaq.

Poul Johansen ukiut 45-t Danmarkimi najugaqareerpoq, kunnginngortitsinissarli kalaallinit inuulluaqqussuteqarfigineqarluni peqataaffigineqassasoq taassuma pingaartippaa.  

- Taama persuarsiorfiutigisussami peqataanissarput pingaaruteqartoq isumaqarpunga. Kunngikkormiummi umiarsuarlutik timmisartorlutilluunniit Kalaallit Nunaannut tikikkaangata ornigarneqarluartarput. Erfalasulisaarlunilu tikilluaqquneqartarlutik.

Kalaallit Illuutaanniit Christiansborg Slotspladsip tungaanut ingerlaaqatigiinnissamut qanoq amerlatigisut takkunnissaat taassuma eqqoriaruminaatsippaa. Sønderjyllanimiilli aamma nammineq aggerfimminiit takkuttoqassasoq Poul Johansenip nalunngilaa.    

- Kalaalerpaaluit Sjællandip kujataaniit aamma Alsimiit Frederiup kunnginngortinneqarnissaa persuarsiutigiartorlugu takkunniarput, taanna oqarpoq.

Aaqqissuisoq: Kunnginngortussaq kalaallinut ammasoq

Nutaamik kunnginngortitsisoqareernerani kalaallit kunngikkormiunik isiginninnerat allanngorpallaarnavianngitsoq taassuma ilimagaa.

Dronning Margrethemmi nunarput nalunngilluarpaa, taassumalu ukiut ingerlanerini nunatsinniittarnermini ajunngitsumik pineqartarnerminut kalaallit innuttaasut ukiortaami oqalugiarnermini qujassuteqarfigai.

Kunnginngortussarli nunatsinnut immikkuullarissumik atassuteqartoq Poul Johansenip maluginiarsimavaa.

- Kunnginngortussaq Frederik kalaallinut inussiarnerluinnartuusoq uagutsinullu ammasuusoq maluginiartarpara.

Kunnginngortitsineq KNR-TV-kkut nal. 05.00-imiit ulloq tamaat malinnaavigineqarsinnaassaaq. 

Kongens Nytorvimiit toqqaannartumik aallakaatitsineq TV2 Danmark suleqatigalugu KNR2-kkut tallimanngorpat nal. 16.30 isiginnaarneqarsinnaassaaq.