Kunngikkut nunatsinnukassasut

Kunngip Frederiup dronning Maryllu nunatsinnut tikeraarnissaannut ulluliisoqarpoq.
Tamanna maanna inissinneqarpoq, kunngi Frederik aamma dronning Mary juunip 29-anit juulip arfineq-pingajuanut nunatsinniissapput. Assi © : Nikolai Linares/Ritzau Scanpix
februaarip 09-at 2024 11:11
Nutserisoq Connie Fontain

Kunngeqarfik Danmark januaarip 14-iani nutaamik kunngikkoqalerpoq. Kunngi Frederik qulingat dronning Marylu dronning Margrethe aappaanut taarsiipput.

Kunngikkullu nunatsinnut pisortatigoortumik tikeraaqqaarnissaat tassani pissangatigineqalerpoq.

Tamanna maanna inissinneqarpoq, kunngi Frederik aamma dronning Mary juunip 29-anit juulip arfineq-pingajuanut nunatsinniissapput.

Kunngikkormiut tusagassiuutinut nalunaarummi allapput.

Nunatsinnut taamaallaat tikeraassanngitsut. Kunngip dronningillu Sverige, Norge, Savalimmiut nunarpullu tikeraarlugit maajimi aallartissapput.

Kunngikkormiut umiarsuaat Dannebrog atorlugu angalassapput, taannalu aqqutaani inigiutigissavaat.

Kunngikkut Sverigemut Norgemullu tikeraarnerat naalagaaffinnut tikeraarneranni siulliussapput. Tamanna maajip arfernanit 15-ianut pissaaq.

- Naalagaaffimmi qullersat siullermeertumik tikeraarnerat kunngikkormiunut Sverigemi Norgemilu naalakkersuisunik naapitsinissamut periarfissiissaaq, tamannalu nunani avannarlerni kunngeqarfiit akorannni qanimut atassuteqarnermut malunnartitsissalluni, kunngikkormiut tusagassiuutinut nalunaarummi allapput.

Tamatuma kingorna Naalagaaffeqatigiinni angalaenerup immikkoortuani siullermi Savalimmiut juunip 11-anit 14-ianut tikeraassavaat.

Miunnerunngitsumillu kunngikkormiut juunip naaneranit juulip aallartinneranut nunatsinniissapput. 

Tikeraarnerani pilersaarutit piffissami kingusinnerusukkut nalunaarutigineqassapput.

Polenimut siullermik angalasoqartoq

Kunngip Frederiup kunnginngornermi kingorna nunanut allanut angalanerani siulleq Polenimut angalaneruvoq. Tassani  januaarip 31-anit februaarip aappaanut inuussutissarsiornermi nittarsaannermermi peqataavoq.

Polenimut angalanissaa kunngiuffimmik anaanaminit, dronning Margrethemit januaarip 14-ianit nangitsinissaata nalunaarutigineqanngineranili pilersaarutaavoq.

Kunngip nuliatalu nunanut allanut angalaqatigeeqqaarnermini Sverige Norgelu tikeraaqqaarumaaraat siusinnerusukkut nalunaarutigineqarnikuuvoq.

- Danmarkimi kunngikkormiut katisimasartik peqatigalugu nunanut sanilerisaminnut angalaqatigeeqqaartarnerat ileqquuvoq, kunngikkormiut Instagramikkut januaarimi allapput.