Kunngikkormiut Qeqertarsuatsiaani

Kunngissakkut qitornaallu Qeqertarsuatsiaanut nalunaaqutaq qulingiluanut tikipput, Qeqertarsuatsiaarmiullu qilanaaqalutik piareersarsimapput.

Kunngissakkut qitornaallu tikilluaqquneqassapput, erinarsoqatigiillu Qeqertarsuatsiaat Nipaat aamma erinarsussallutik:

- Kunngissakkut maanga tikinnissaannut piareersaateqarpugut.

- Tikikkunik sissiukkami tikilluaqqusaariarlutik, Telep illuutaata tungaanut qaqqamut pisuttuaqatigineqassapput, Danmarki qaqqavimmik qaqqaqanngimmat misigisaqartikkusullugit, Qeqertarsuatsiaani nunaqarfimmi aqutsisut siulittaasuat Jonathan Jacobsen taama oqarpoq.

Qeqertarsuatsiaarmiut piareersarluarsimapput
Tikeraartoqarnissaq pillugu Qeqertarsuatsiaarmiut piareersarluarsimapput, kunngissakkut nunaqarfimmut tikeraarsimanerannut takussutissaq ilaatigut aamma uleerneqassalluni:

- Qaqqamiit ammukalernermi ujarassuarmi qullerpaami nipitiffigineqarpoq messingplade, maani tikeraarsimanerannut eqqaaneqaatissaat, qaqugorsuarmut atasussanngorlugu. Taanna kunngissap uliissavaa, Jonathan Jacobsen taama oqarpoq.

Piffissap sinnera kunngikkormiut nunaqarfimmi takornariartinneqassapput paaqqinnittarfiit assigisaallu pulaarneqassallutik, soorlu nerisassat sasaalliunneqassallutik unammisitsisoqassallunilu najugaqartunut.