Kunngikkormiut eqqaaniaanermi peqataapput

Utøyap eqqaani politiit sulinerminnik paasissutisseerusullutik tusagassiortunik katersortitsipput.

Utøyap eqqaani politiit pisoqarnerata nalaani uniinnarlutik peqqarniisaarniartartunik akiuiniaqatigiit Oslomit takkunnissaat utaqqiinnarsimagaat, Norgemi inuit isumaqarsimapput.

Taamaattoqarsimanngilarli, uniinnarlutik utaqqisimanngillat. Utøyap eqqaani politiit peqqarniisaarniartartunillu akiuiniaqatigiit ataatsikkut takkussimapput. Paatsoornerullu taassuma iluameersumik paasisitsisoqarneranik illuatungilerneqarnissaa Utøyap eqqaani politiinit pingaartinneqarpoq.

Qeqertamilu susoqarsimanera qeqertamullu pilluni qanoq issimanersoq nassuiaaserneqarpoq, politiinut takkuttunut sakkortusimaqaaq.

Politiit arriippallaamik qisuariarsimanersut aperineqaramik akipput sukkanerpaamik takkussimallutik. Aasaanerani sulinngiffeqarfiup naligimmagu sulisut ikinnerusimapput, namminnerli isumaqarput suliassartik suliarilluarsimallugu. Inatsiseqarnermullu ministerimit sulinertik pillugu ippassaq nersualaarneqarput.

Oqaatigineqarporli suleriaaserineqarsimasoq nalilersorneqassasoq, tusagassiortunillu katersortitsinermi tamanna nutaarsiassatuaavoq. Inatsiseqarnermut ministeriaqarfiup politiillu sulisimanertik tamaat nalilersussavaat, sulisimanertik ajorisassaannginnersoq paasiniarlugu.

Københavnimi Vor Frue Kirkemi Norgemi toqutaasut ullumi eqqaaniarneqarput.

Oqaluffik inuinnarnik qallunaanik norskinillu ulikkaarpoq, amerlasuullu iserniarlutik utaqqillutik.

Ataqqinartorsuaq Dronningi kunngissakkullu qallunaallu ministerii qallunaallu politikerii arlallit aamma eqqaaniaanermi ilaapput.

Danmarkimi Norgep ambassadøria Jørg Villy Brunebakk ministeriunerlu Lars Løkke Rasmussen oqalugiarput. Tamarmik Danmarkip Norgellu ataqatigiinnerat eqqartorpaat. Ministeriuneq Lars Løkke Rasmussenillu inuiaqatigiit norskit ammasuunerat oqalugiarnermini eqqartorpaa.