Kunngikkormiut Angakkussarfiliassapput

Ullumi ulloq tassaavoq Dronningip uiatalu Nunatsinni angalaarneranni ullut arfineq-aappassaat. Pilersaarutit malinneqassappata kunngikkormiut Qeqertarsuarmut ullaap-tungaani nalunaaqutaq qulinut tikissapput.
Allattoq Mads Lynge
juulip 15-at 2011 05:30

Kunngikkuni dronningiusup pingajussaa uitik ilagalugit Qeqertarsuarmut tikeraarput. Dronningip siuaasai kunngi Christian X aamma Dronning Alexandrine Qeqertarsuarmut 1921-mi tikeraarput, kunngi Frederik 9. aamma Dronning Ingrid 1952-imi tikeraarlutik, kiisalu Dronning Margrethe Prins Henrillu pingasoriarlutik siornatigut Qeqertarsuarmeereerput.

Kunngikkormiut kingullermik 2004-mi tikeraarput, kunngissaq Frederik, taamanikkullu nuliassaa, Mary, ilagalugit ilaatigut aamma qimusseramik.

Ullumikkullu pisussat allaanerulaarput. Katersugaasivik pulaarneqassaaq, silamilu kaffillertoqassalluni.
Ilaqutariit Karl aamma Hansine Brobergikkut naatsiiviat kiisalu Arktisk Station, tassa Angakkussarfik, kingorna aamma alakkarterneqarumaarput.

Ulloq kunngikkormiut umiarsuaanni Dannebrogimi naggaserneqassaaq, kunngikkormiut qaaqqusanik tassani nereqateqassammata.

Silasiortut DMI-meersut ilimasaarutaat eqquutissappat seqinnarissuup ataani Qeqertarsuarmi kunngikkulerisoqarumaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq