Kunngikkormiunik nuannarisalik kaffillerpoq
Dronning Margrethep Prins Henriullu tikinnissaannut qilanaarpit?
- Assut qilanaarpunga, Kunngikkormiut meeraaninniilli nuannarivakka, angajoqqaattami qangarsuarniilli aamma nuannarimmatigit.
Sooruna taama soqutigitigivigit?
- Asuki, innaraangama aviisinik saarmiulersortarpunga videonillu kunngikkormiunut tunngasunik, ilaqutariit tamatta assorujussuaq nuannarivagut.
Aamma asserpassuaqarputit maani
- Uffami, qanorluunniit isiginnaartigigaluarutsigit qatsussinnaanngilavut.
Pulaarnissaannut pissangavit?
- Pissangalaarpunga, aammami utoqqangama qajannartuungama, uppissanasoralunga.
Iseraluarpata sunissaat qanoq takorloorpiuk?
- Asuki, ilitsersorneqaruma naalassuakka, qanoq iliorniartut nalugakku.
Kaffillerniarpit?
- Kaffisorusuppata kaffisortissinnaavakka. Aamma imeqarpunga nioqqutissamik, Kalaallit Nunaata imianik.
Oqaluutissagaluarukku qanoq oqaluttuutissagaluarpiuk?
- Asuki, aperippanga akisinnaavara.
Annilaaganngilatit?
- Annilaangalaarpunga, utoqqaagamami ajortumik akeriataarsinnaanissara ernumaginakku,Ane Kruse ualigaa taama oqarpoq.
Kunngikkormiut Niaqornanut kinguninngua tikipput.
Tikilluaqqusinerup kingorna oqaluffimmi, atuarfittut kommunillu allaffiatut aamma atorneqartumi, kaffisuuttoqarpoq. Nunaqarfimmi aqutsisut siulittaasuat qalipakkamik Kunngikkormiunut tunissuteqarpoq.
Kuupik Kleist aappaalu Aviaja Vandersee aamma tunissutisipput. Kuupik qitequtitaarpoq, Aviaja taskinnalluni. Quimi, Niaqornani illuni nutaannginnersaasumi, kinguninngua takornarniartitsisoqarpoq.
Dronningilu Ane Krusemut naggataagut tassa pulaarpoq. Prins Henrik pitsorlukkami pulaaqataanngilaq, aalisakkat panertunik nikkunillu qimerluuiinnarluni.
Ane Kruse nuannaaqaaq,, pulaartoqarnerminilu ilaquttani ilagai. - Saqqarmioq nersornaat pigiinnarsinnaagaa Dronning oqarpoq.
Kunngikkormiut ungasinngitsukkut arferngup missaani Niaqornat inuulluaqquvaat, Uummanniarlutik aallarlutik, pisortatigoortumik taavani tikeraarnerat aqagu aallarteqqissalluni.
