Kulusummiuaqqat ataatsimeersuarnermi peqataassapput

Atuartut Noahp Umiarsuaanik oqaluttuaq kalaallisuunngorlugu sløjdernerminni qajanngortillugu suliarisimavaat ministerimullu Connie Hedegaardimut nassiullugu. Sila pillugu ministerip atuartut Københavnimut tamatuma kingorna qaaqquvai, sannavimmik sulisumik ataatsimeersuartoqarnerani pilersitsiartoqqullugit.

- Quassuttuumik meterinik marlungajannik takissusilimmik nassaarpugut, qapiarlugulu qaannatut meeqqat isikkoqalersippaat, taavalu Nunatta uumasui marlukkaarlugit pilattorpaat, qaannamullu ikillugit. Isumaqarpugut nuanneqisoq kusanarlunilu, aamma nalunaajaateqarpoq inuit, Kalaallit Nunaanni najugaqartut tamarmik isumaqatigisinnaasaannik, tassalu maani pinngortitaq sunnertiaqisoq paarissagipput, Kulusummiuaqqat sløjdertitsuat, Anne-Mette Holm Sermitsiamut oqaluttuarpoq.

Noahp Umiarsuaa Connie Hedegaardimut meeqqat nassiuppaat, allakkat ilanngullugit, taakkunani meeqqat allallutik silap pissusia pillugu ataatsimeersuarnermi silap pissusianut ministerip kalaallit meerartai illersussagai.

Sila pillugu Danmarkimi ministerip Noahp qajaa nuannaarutigisorujussuuaa, qajarlu allaffiani maanna nivingavoq, assaannarmillu allatanik meeqqat allaffigai, silap pissusaata allanngoriartornera pillugu Københavnimi decembarip ulluisa aqqaneq-aappaanniit 20-ata tungaanut ataatsimeersuarnissamut qaaqqullugit.