Kulusummit timmisartoq kalerrisaarut pissutigalugu utiinnartariaqartoq
Timmisartoq Dash 8 Tunumi pingasunngornermi ualikkut isumannaallisaaneq pissutigalugu mittariaqarsimavoq.
Timmisartoq Kulusummit aallartoq aallaqqammiinnarluni utertariaqarsimavoq.
Isumannaallisaaneq pissutigalugu mittariaqarnerup ajornartoorlunilu minnerup assigiinngissutai:
Ajornartoorluni minneq pinasuarnerullunilu ajornakusoorneruvoq, isumannaallisaanerlu pissutigalugu minnermi timmisartup qanoq minnissaanut ersarissumik periusissiaqarluni.
Air Greenlandimi attaveqaqatigiinnermut akisussaasoq, Katja Vahl KNR-imut mailikkut paasissutissiivoq.
Timmisartortartut aquttarfimmi motorimi ajoquteqarneranik takussutissaqarnera pissutigalugu motoorip aappaa qamillugu isumannaallisaaneq pissutigalugu mittariaqarlutik aalajangerpaat.
Allamillu ajoquteqarunartoq paasineqarpoq:
- Ajoqutaasoq ilimanarluinnartumik paasineqarpoq, aallaqqaammulli ilisimagisatut motoori ajoquteqanngilaq.
- Uanili nammineerluni backuppiania kukkusumik aallartippoq kalerrisaaralunilu, tamannalu isumannaallisaaneq pissutigalugu mittariaqarnermut atatillugu periusissamik aallartitsivoq, Katja Vahl allappoq.
Ilaasut tamarmik maanna Kulusummiipput ajoqusertoqanngilarlu.
Isumannaallisaaneq pissutigalugu mittariaqarnernut allanut attuumassuteqanngitsoq
Timmisartumik Dash 8-mik isumannaallisaaneq pissutigalugu qaammatit pingasut ingerlaneranni pingajussaanik mittariaqartoqarpoq.
Narsarsuarmit timmisartoq Kangerlussuarmut apriilip aallartinnerani isumannaallisaaneq pissutigalugu mittariaqarsimavoq. Ilaasut inuttallu ajoratik timmisartoq mippoq.
Timmisartumilu tassani timmisartumi aquttut motoorimi ajoquteqarneranik takussutissaqarnerat pissutigalugu isumannaallisaaneq pillugu mittoqarpoq.
Air Greenlandimit Dash 8 alla motoorimigut ajoquteqarnera pissutigalugu isumannaallisaaneq pissutigalugu Nuummut februuarimi mippoq.
Pisut taakku pingasut imminnut attuumassuteqanngitsut, Air Greenlandip erseqqissaatigaa:
- Ullumikkut pisut pisimasullu allat akornanni attuumassuteqartoqanngilaq, Katja Vahl allappoq.