Kulusuk ukiuni 100-ni atuunnera nalliuttorsiutigineqalersoq

Kulusuk 1909-mi pilersinneqarami Qulusummik ateqaraluarpoq, maannalu ukiut 100-it qaangiuttullu Kulusuk 320-nik innuttaqarpoq. Taakkualu nunaqarfitsik ukiuni 100-ni nalliuttorsiutiginiarlugu piareersaleruttorput.
Allattoq Oline I. Olsen
juulip 24-at 2009 06:43

Tivasussat, isiginnaartitsisuussat erinarsoqatigiittussallu augustip arfinernanut arfineq pingajuatalu tungaanut piareersarnissaminnut suli piffissaqalaarput. Ulluni taakkunani pisortatigoortumik nalliuttorsiornerit ingerlanneqassapput, ilaatigut Kommuneqarfik Sermersuup borgmesterianit Asii Chemnitz Narupimit, Nunami namminermi Naalakkersuisumit Anthon Frederiksenimit kiisalu Inatsisartut siulittaasuannit Josef Motzfeldtimit peqataaffigineqartussaallutik.

- Meeqqat nalliuttorsiornermi aallarniisussatut nunaqarfimmi aqutsisunit pingaartinneqarput, nunaqarfimmi aqutsisut siulittaasuat Pele Maratse oqarpoq.

- Qaqqap qaavani erfalasoq amuneqariarpat, meeqqat suliaminnik takutitsissapput, kingorna kalaaliminertuuttoqassaaq, isiginnaartitsisoqarluni, tivasoqarluni kiisalu inussuliamik uleersisoqassalluni, Pele Maratse pilersaarutit pillugit oqarpoq.

Nalliuttorsiornermut atatillugu naalagiaqatigiittoqassaaq eqqaaniaanertalimmik, nalliuttorsiornerit naggaserlugit katersortarfimmi qittattoqarumaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq