Kulusuk nunaqarfittut ataannassappat inuussutissarsiutitigut ineriartortitsiuartoqartariaqarpoq
- Takornariat inuussutissarsiutitut Kulusummut pingaaruteqarput, taamaammat takornariaqartitsineq ineriartortinneqartuartariaqarpoq. Kulusuk angallannikkut aamma qitiuvoq. Tasiilamuinnaq pingaaruteqanngilaq, nunaqarfinnut aamma pingaaruteqarpoq, Pele Maratse oqarpoq.
Kulusummi nunaqarfimmik aqutsisut siulittaasuat Pele Maratse taama oqarpoq.
Taanna Kommuneqarfik Sermersuup borgmesterianik Asii Chemnitz Narupimik ullumi ataatsimeeqateqarpoq, borgmesterip nunaqarfimmi aqutsisut aningaasatigut aqutsinermi akisussaaffimmik annerusumik tunivai, tamannalu nunaqarfimmi aqutsisut siulittaasuattut tulluusimaarutigaa.
Kulusummi nunaqarfimmik aqutsisut siulittaasuat Pele Maratse taama oqarpoq. Kulusuk 320-nik inoqarpoq. Kulusuup ukiunik 100-nngortorsiorneqarnera ulluni pingasuni nalliuttorsiutigineqassaaq.