Kulturimut aningaasaliissutit millionit maanna agguaanneqarput

Katillugit 1.173.500 millionit agguaannneqarput.

Tassa taakku aningaasat ilaatigut meeqqanut inuusanik isiginnaartitsinermut, tusarnaartitsinermut qullernillu takutitsinermut agguaanneqartut.

- Naalakkersuisut, tassunga atatillugu eqqumiitsuliortut, sumiiffinni immikkuullarissuni nalimmassaalluarlutillu nutaanik eqqarsallaqqissut, nersualaarusuppaat. Ilaatigut takuagut nipilersortartut nittartakkakkut naapeqatigiittarfiit atorlugit meeqqat inersimasullu aliikkusersoraat ulluinnagullu oqinnerulersillugit, Katti Frederiksen (S) oqarpoq.

Aningaasat kingulliit kulturip iluani, sulianut assigiinngitsunut agguaanneqarput. Taakkulu immikkoortortat sisamaallutik agguarpaat.

Ilinniartitaanermut, Kultureqarnermut Ilageeqarnermullu Naalakkersuisoqarfik naapertorlugu ukioq manna aningaasat tapiissutaasussat nungupput.

Inuusat, qullernik eqqumiitsuliat tusarnaartitsinerillu

Aningaasallu sulianut assigiinngitsunut arfinilinnut agguaanneqarput, Ilaatigut meeqqanut inuusanik isiginnaagassiamut Ujarneq Fleicherimit isiginnaagassiarineqartumut, Naleraq Lightip qullernik eqqumiitsuliaanut, Liima Inuinut kiisalu kujataani illoqarfinni assigiinngitsuni assinik saqqummersitsinermut.

- Iluaqaaq aamma uagutsinnut iluarpoq. Tikitatsinnut aamma iluarsuaarpoq. 

- Februaarimi tikinngitsuukkagut massakkut tikissavagut, Ujarneq Fleicher oqarpoq. 

- Illoqqarfinni taakkunani suleqataasut assut qujamasussuaarput. Uagullu aamma tikikkatta taamatullu illoqarfinnut aliikkusersueqataasuulluta suleqataasinnaagatta qujamasuppugut. Uanga pilersaaruteqarpunga suli amerlanerujussuarnik takkuttoqaqqikkumaarporlu. 

Kalak filminngortinneqarniartoq 

Filminngortinniarneqartoq ”Kalak” Kim Leinimit atuakkiarineqartoq, suliniutillu allat pingasut 672.000 koruuninik tapiiffigineqarput.

Atuakkanullu suliniutit marluk aamma 254.000 koruuninik taperneqarput. Tassani Meeqqanut atuagaq: ”Suna Immikkut Piginnaasaraara?” Arctic Mediamit meeqqanut atuakkiarineqartoq atuagarlu ”Eriagisaq” sanaluttartumit Kim Kleist- Eriksenimit eqqumiittuliorneq pillugu atuakkiarineqartoq tapiiffigineqarput.   

Naalakkersuisut kulturimik sulialinnut aningaasaliissutinut ataavartumik qinnuteqartarnerat, coronavirus pissutaalluni katerisimaartarnermut killilersuinerit eqqumiitsuliortunik eqquinerat pillugu atugarissaarnerutikkusullugit ukioq manna ammaassiffigaat.

Aningaasat katillugit 2.442.000 eqqumiitsuliortunut assigiinngitsunut 36-nut ukioq manna tunniunneqarput.