Kulturikkut kingornussat cd-liaraat
Issittumi ilisimasassarsiortartoq William Thalbitzer tunumiut qilaatersortarnerannik 1906-ip nalaani immiussivoq taamanikkut ilisimasassarsiorluni Ammassalimmi 1905-1906-mi ukiigami.
Immiussat taakku ukiut 100-ut sinnerlugit pisoqaassusillit nipilersukkat tunngavigalugit inuiaat pissusaannik ilisimartusartup Michael Hauserip aamma nuusiortitsisup Karsten Sommerip nipigissarteriarlugit saqqummersippaat.
Kristumiussuseq tunumut kingusissukkut aatsaat takkuppoq kitaamiut kuisimasunngornerat kingoqquterujussullugu. Hans Egede Nuup eqqaanut pivoq 1721-mi Tunumilu oqaluffik siulleq aatsaat 1904-mi sananeqarluni. William Thalbitzerip immiussimavai qilaatersortut piffissami inuit anersaakkut inuunermut allaasumut attaveqarneranni sanaajupput.
Cd-mi aamma saqqummersinneqarput aqaatit 1900-kkut ingerlaneranni atorneqartarsimasut. Qilaatersortut aqaatillu cd-tut saqqummersinneqarput qulequtserlugit "East Greenland - 1906-89" inngerutillu tuluttut allataasumik nassuiaasersorneqarsimapput tassani oqaluttuarineqarluni inngerutit sananeqarnerisa nalaanni pissutsit qanoq ittut atuussimanersut.
Cd-p saqqummersup aapparaa Avanersuarmiu Imîna Imîna. Taanna piniartorsuusimavoq aammalu inngeruterpassuarnik atuisarsimalluni, inngerutaalu maanna 80-it sinnerlugit ukioqartup Michael Hauserip 1962-mi Qaanaami immiussimavai. Taakku immiussat maanna ukiut 50-ngajaat ingerlariillartullu saqqummersinneqarput.
Imînap ernutaa Robert E. Peary II aamma Hivshu-tut ilisimaneqartoq aatami inngerneranik tusarnaaqataasimavoq taamalu cd-p saqqummersinneqarnissaani nassuiaasersuinermut ikiuussimalluni. Cd taanna taaguuteqarpoq "Imîna Imîna - Thule 1962".
Cd-it taakku saqqummersitanut "Traditional Greenlandic Music"-imut atapput maannalu saqqummersut sioqqullugit marluk saqqummersinneqarput tassani Avanersuarmiut inngerutaat 2010-mi saqqummersinneqarmata. Pilersaarutaavoq cd alla 2012-mi saqqummersinneqassasoq taannalu saqqummerpat saqqummersinneqarsimasut tallimat katersatut ataatsimut box-edition-imik taasaattut pisiarineqarsinnaalissapput, nuusiortitsisoq Karsen Sommer nassuiaavoq.
