Kulturikkut ingerlatsisut aningaasanut inatsimmi sipaarniarfigineqarniarnertik akerlilerpaat
Naalakkersuisut siunnersuutigaat Nunatta Isiginnaartitsisarfia 30 procentimik ilanngaaffigineqassasoq - 10 millioniniit 7,2 millioninut 2014-imi, 2015-imi aamma 2016-imi.
Kulturikkut eqqumiitsuliornikkullu ingerlatsisut EPI sipaarniuteqarneq taavaat "kulturikkut eqqumiitsuliornikkullu ingerlatsineq peqqarniisaarfigineqartoq."
Nunatta Isiginnaartitsisarfia ukiorpassuit sorsuutigereerlugu, isiginnaartsitsinermut Isiginnaartitsisartullu ilinniarfiannut sisamanik ilinniartoqartumut atugassanik, 2011-imi aalajangersimasumik aningaasaliiffigineqartalerpoq.
Tamatuma kingorna Isiginnaartitsisarfik nunatsinni angalasarpoq, 2012-iinnarmi 15.000-nit amerlanerusunit takuneqarsimasunik. Ukioq manna isiginnaariarsimasut suli amerlanerupput, ilaatigut nipilersorluni isiginnaagassiaq "Qullissara" Tivolimi augustip aallaqqaataasiornermi takutinneqarmat.
Aningaasaliissutit 3 millioninik ilanngarneqarpata kulturikkut ingerlatsineq aningaasassaaleqereersoq suli pissaaleqinerulissasoq EPI'p tikkuarpaa.
Kultureqarneq eqqarsaatigalugu tamanna akuerineqarsinnaanngitsoq EPI isumaqarpoq.
Taamatut kultureqarnermut eqqumiitsuliornermullu suusupaginninnerujussuaq tunngaveqarpoq Naalakkersuisut kulturi pillugu politikkeqannginnerat. Inatsisartuni kingullermik kulturi pillugu nassuiaasiortoqarpoq 2004-imi. Taamaattumik Kultureqarnermut Naalakkersuisoq sakkortuumik kaammattussavarput kulturi eqqumiitsuliornerlu pillugu nassuiaammik sanaqqullugu, Inatsisartut kulturikkut eqqumiitsuliornikkullu tunaartalersueqataasinnaanngorlugit, minnerunngitsumillu Naalakkersuisut kulturi pillugu politikkeqalernissaat anguniarlugu.
- Tamanna kulturimik suliaqartut pisariaqartittorujussuuaat, suliatik toqqissisimallutik suliarisinnaajumallugit, Eqqumiitsuliornikkut Pinngorartitsisut Ingerlatsisullu allakkatik naggaserpaat.