Kulturikkut illorsuaq Taseralik aasaanerani saqqummersitsissaaq
Arnannguup eqqumiitsuliaasa ilai Taseralimmi KIMIK-up saqqummersitsinerani allat peqatigalugit saqqummersinneqareerput. Maanna siullermeerluni kisimi Taseralimmi saqqummersitsisussanngorpoq.
Arnannguaq Høegh kalaallit eqqumiitsuliortut nuimanerit ilagaat. 1974-mi Sisimiuniinnermini eqqumiitsuliornermik ilinniartussanngorluni paasivaa, taamalu eqqumiitsuliornermik pimoorussinini aallartillugu.
Ukiunik 40-nngortorsiortoq
Maanna ukiut 40-t qaangiuttut saqqummersitsinissaa Taseralimmi nalliuttorsiorpalaartumik malunnartinneqassaaq. 1996-imit ulloq mannamut eqqumiitsuliai saqqummersinneqassallutik.
Arnannguaq eqqumiitsuliornermik ilinniarfimmi Nuummi pisortaavoq, ullullu tamaasa inuusuttunik pikkorissorsuarnik piginnaasaqarluartunik peqateqartarluni, aammalu pikkorissunik Nunatsinni nunanilu allani suleqateqarluni.
- Ukiut ingerlanerini sumiiffinni assigiinngitsorpassuarni eqqumiitsuliani saqqummersittareerlugit maanna Sisimiuni saqqummersitsisussanngornera Taseralimmit qilanaarutigaarput, kulturikkut illorsuaq Taseralik tusagassiorfinut nalunaaruteqarluni taama allappoq.
Ammaanersiorneq pissaaq juunip 19-iani nal. 16.30, ammaanersiornermilu Arnannguaq Høegh peqataassaaq.