Kulturi gymnasialu Sisimiuni suleqatigiipput
Ataatsimiinnermi suleqatigiinnik pilersitsisoqassaaq Taseralimmi ilinniarnertuunngorniat ulloqartarnissaannik aaqqissuisussanik. Taamaasiornikkut neriuutigineqarpoq ilinniarnertuunngorniat illoqarfimmi akuunerulissasut illoqarfimmut iluaqutaasumik.
- Atuartitseriaatsimik tunngavilimmik manna pilersinneqalerpoq. Ukiorpassuarni maani Sisimiuni ingerlattarsimavarput ammasumik atuartitaanermik taaneqartartoq. Tassani ilinniartut ullup unnuallu ingerlaneranni nalunaaquttap akunnerini 24-ni atuarfimmut isersinnaasarput. Taava atuareernerup kingorna atuartut init atuartitsiviit katerisimaartarfittut atulersimavaat. Tamanna tulluarpallaanngilaq atuarfimmiinneq ilikkagaqarnissamik aallaaveqassammat. Taamaammat atuartut paarlakaatsillugit ingerlatsinermik aallartitsivugut aammalu akisussaaffittut tigusimavarput arlaat peerutsigut arlaannik taarteqartittariaqarlugu. Maanna Taseralimmik isumaqatigiissuteqarnikkut inissippoq, ilinniarnertuunngorniarfimmi pisortaq Poul V. B. Jensen KNR.gl-mut oqarpoq.
Kulturip illorsuani kulturimut tunngasut piginnaasaqarfigineqarput. Sceneqarpoq, seqertitsiveqarpoq ineqarlunilu Sisimiuni ilinniarnertuunngorniat sullivigisarsinnaasaannik.
- Arnajaq Støvlbæk siunnersorsimavara suleqatigiissinnaanermik tamannalu ingerlaannaq ilalersimavaa. Isumassarsiaq pilerpoq Sogndalimi ilinniartitsisut højskoleanniillunga. Taanna illoqarfik anginngilaq Sisimiunut assersuunneqarsinnaalluni tassanilu sammisat ilaat illoqarfimmi aallunneqartarput. Neriuppunga tamanna ilinniartut ilassilluarmaaraat. Ujaraq tatsimut igittutut issavarput mallillu siammariartorumaarput takussavarpullu mallit sunik pinngortitsiumaarnersut, Poul V. B. Jensen oqarpoq assullu ilinniartunut siunnersorti Elisabeth Jensen nersualaarlugu aallartisaalluni Taseralimmi ataatsimiinnissamik pilersaarusiortuummat.