Kullorsuarmiu: Asiat simersaliat iffiamininnguillu pujugutisiagut pinsisiutigissavagut
Umiarsuaq nioqqutissanik pisarialinnik pajuttoq, Pajuttaat maanna Kullorsuup kujataani 30 kilometerisut ungasitsigisumiilluni sikorsuit pissutigalugit ingerlaqqinnaveeqqavoq.
Nioqqutissat pisariaqartinneqartut marsimili nungupput. Avammut attaveqaatituaq qulimiguulik akuttunngitsumik nunaqarfimmut Kullorsuarmut tikittaraluarpoq pisiassamininnguanik usilluni, taakkuli paggallugit ingerlaannaq nungunneqartarput naak akisuukasiugaluartut.
- Igaassat pisiniarfimmi pisiassat marsimili nunguttalerput, pisiassallu ikittunnguit qulimiguulimmik tikisinneqartaraluarlutik, taakkuli inunnit ikittunnguanit taamaallaat pisiarineqartarlutik tassami ilaat nuguussaasaramik. Pilersuisup umiarsuaq tikittussaq kisiat tuppallersaatigisimanerpaa qulimiguulillu akisugisimanerlugu, Themothæus Petersen taama oqarpoq.
Nunaqarfimmi pissaaleqinerusut eqqarsaatigalugit, taakku meerartaat atuariartunnginneranni ullaakkorsiorniassammata, sipaagaqartut ilaasa sinniminnguatik taakkununnga pajugutigisarpaat.
- Uangut sipaagamininnguagut meerartalinnut pajugutigisarpagut. Uangut Upernavimmi ilaquttatsinnit iffiamininnguanik pajugutisivugut taakkulu pinsisiutigissavagut, umiarsuaq paujuttoq ulluni qaninnerni tikinngippat.
Themothæus Petersen oqarpoq, nangillunilu oqaatigalugu, ukiuni kingullerni nunaqarfinnut avinngarusimasunut inuussutissanik pajuttuineq sumiginnagaasimasoq, tamannalu oqartussanit aaqqinneqartariaqartoq, siunissami taamatut nalaataqaqqittoqaqqunagu, ingammik meeqqat kaattalersut eqqarsaatigalugit.
Themothæus Petersenip ilanngullugu eqqaava nunaqarfik Nuussuaq Kullorsuartut aamma maannakkorpiaq atugaqartoq.
Nioqqutissanik pajuttoq umiarsuaq Pajuttaat maanna Kullorsuup kujataaniittoq sikorsuaqarnera pissutigalugu ingerlariaqqissinnaajunnaaqqavoq, sikullu sinaani maanna uninngaannarluni. Themothæus Petersenip Kullorsuup pisiniarfiani ingerlatsisoq, Magnus Danielsen ualiartoq oqaloqatigigamiut, taanna massakkut qanoq iliuuseqarniarluni nunaqarfimmi qamuteralaatillit ikiorterisimagai oqaatigaa. Tassalu sikukkut qamuteralannik nioqqutissanik aallertoqassasoq maanna eqqarsaataalerluni.
Nioqqutissanik assartuussinermut akisussaasuusoq, Ineqarnermut Attaveqarnermullu Naalakkersuisoq, Jens B. Frederiksen tusagassiutinut nalunaarummini allappoq, Kullorsuarmi pisoq ajuusaarutigalugu aammalu pisoq KNI, Royal Arctic Line aamma Air Greenland peqatigalugit malinnaavigeqqissaaritik.
