ASSIT Kullorsuarmi skakkimik festivalertitsisoqartoq
- Tikeraarnerput misigisaqarfigilluarparput, Hrokurinnimeersoq Máni Hrafnsson tusagassiorfinnut nalunaarummi allappoq. Festivalimilu Kullorsuarmiut meerartaat inuusuttaallu taama amerlatigisut skakkimik ilinniartitsisoqarneranut unammersuarnermullu peqataanerat nuannaarutigaa.
Skakkertartut peqatigiiffiat aamma nunaqarfimmiut meerartaannut cirkusimik ilinniartitsillunilu eqqumiitsuliornermik pikkorissaavoq.
Kullorsuarmi sunngiffimmi sammisassaqartitsinermut pisortaq, Birgitta Kamman Danielsen, festivalertitsinissamut piareersaatit ilaannik isumaginnittuuvoq, taannalu oqaluttuarpoq meeqqat inersimasorpassuillu skakkimut cirkusilerinermullu tunngatillugu isumassarsiortinneqarlutillu misilittagaqalersut.
Skakkertartut peqatigiiffiannik skakkernermillu ilinniarfimmik festivalertoqarnerani pilersitsisoqarpoq, tamatumunngalu atatillugu Hrókurinn skakkertartut peqatigiiffittaavannut skakkerfinnik 20-nik tunissuteqarpoq.
Avannaata Kommunia, NAPA aamma Air Iceland Connect skakkimik festivalertitsisoqarneranut tapersersuisuupput.
