Kullorsuarmi inoqutigiit ataatsit ullormut 20 liiterimik imertaassunneqartarput
Kullorsuarmiut siorna decembarimili imeqanngillat, taamaammallu inoqutigiit ataatsit ullormut 20 liiterimik imertaassunneqartarlutik.
Tamanna imermik naammattusaarnartuusoq, Kullorsuarmiup Beathe Danielsenip oqaatigaa.
-Anginerusinnaagaluarpoq, imeq atortorujorujussuugaluarpara. Kisianni tassa erngup killeqarnerani taammannaannaq ingerlavugut, Beathe oqarpoq.
AAMMA ATUARUK Kullorsuarmiut suli qerisooqqapput
Beathep imeq sunut tamanut atortaramiuk pisariaqartilluinnartarpaa.
- Sulisoqarama sulisora imeqartariaqartarpoq erruinissaq, asaanissaq, eqqiaanissaq illup iluani, imertaaneqaraangama asatsiterlunga uffarneq atortarpara, tamaasa qalatseqqaarlugit atortarpagut.
Kullorsuarmiunullu allanut imissaaleqineq aamma ajornartorsiutaasoq Beathep oqaatigaa.
- Ilungersunarpasippoq, ilaallu nilattaatsittarput. Assorujussuaq aamma uffarusuttunik tusartarpunga, kuuinnartumik timersoreernermilu ilarpassui illu sullivimmi atorallarmat tamakku atorneqartaramik, Beathe Danielsen
AAMMA ATUARUK Kullorsuarmi imermik pilersuilernerup qaqugu iluarsineqarsinnaanera suli nalunarpoq
Illoqarfinni erngup atornera naliginnaasumik inumut ataatsimut agguaqatigiissillugu 100 liiteri sinnerlugu ullormut atorneqartarpoq. Erngup aqqutaata sapaatip akunnera 8-mi iluarsinissaa naatsorsuutigineqarpoq. Nukissiorfiit nittartakkaminni taama paasissutissiipput.