2017-imut aningaasanut inatsit Kukkusunik nassuiaateqaqqittoq
Naalakkersuisut nutaat aningaasanut inatsimmi amigartoorutini 145 millionit koruuniusuni 8 millionit koruuniinnaat akisussaaffigigaat aningaasaqarnermut naalakkersuisoq, Aqqaluaq B. Egede ataasinngornermi Qanoruumi oqarpoq.
Tamannali eqqunngilaq, Egedellu pingasunngormat Qanoruumeeqqinnermini akisussaasuulluni oqaatigaa.
Aningaasanulli inatsimmi ukiunut missingersuusiorallarfiusuni amigartooruteqarnissamik missingersuineq pillugu eqqunngitsumik paasissutissiivoq.
Aningaasaqarnermut naalakkersuisoq paasissutissanik eqqunngitsunik Qanoruumut sooq saqqummiussisimanerluni ataasinngormat aperineqarpoq.
Aningaasanut inatsimmut akisussaaffini akuerigaa
Aningaasanut inatsimmut akisussaaffini akueraa, paasissutissalli eqqunngitsut pillugit apeqqummut akinani.
Qanoruumiinnerminili naalakkersuisuusimasunut Demokraatillu siulittaasuannut, Randi Vestergaard Evaldsenimut unnerluuteqaqqippoq.
- Aningaasanik kusassaaniarluni meeqqanut isumaginnittariaqarneq sipaarniarfigineqarsimavoq, sanami meeqqanut immikkoortortaqarfik sipaarniarfigineqarsimavoq, taavalu aamma isumaginninnermut aqutsisoqarfiup nukittorsarneqarnissaanut immikkut aningaasaliissutit sipaarniarneqarsimapput, taavalu aningaasanik sinneqartoortitsilluni, Aqqaluaq B. Egede pingasunngornermi Qanoruumi oqarpoq.
Paasissutissalli eqqunngitsut saqqummiuteqqippai.
Isumaginninnermut aqutsisoqarfik nutaajusoq
Dronning Ingridip Napparsimmavissuani meeqqanut immikkoortortaqarfik naalakkersuisuusimasunit sipaarfigineqarsimanngitsoq, peqqissutsimut naalakkersuisoqarfimmit nalunaarutigineqarpoq.
Isumaginninnermullu aqutsisoqarfik nutaajuvoq, aningaasanullu inatsisissatut siunersuutip pingajussaaneerneqarnerani aatsaat ilanngunneqarluni.
false
Najoqqutarisaq: 2017-imut AIS-ip pingajussaarneerneqarnissaanut allannguutissatut siunnersuutinut ilanngussaq I
Naalakkersuisut napparsimmavimmi meeqqanut immikkoortortaqarfimmut isumaginninnermullu aqutsisoqarfimmut salliussineratigut aningaasanut inatsimmi amigartoorutit ilaat pilersinneqartut ilumoorpoq.
Naalakkersuinikkut ataqatigiissaarisoqatigiit 2015-imi innersuussutaat aallaavigalugu isumaginninnermut aqutsisoqarfik pilersinneqarniarpoq, 2017-imulli aningaasanut inatsisissatut siunnersuummut naalakkersuisuusimasunit ilanngunneqarnani.
Pingasuni marluk ilumuunngitsut
Aqqaluaq B. Egedep oqaatigisaani pingasuni marluk taamaasillutik ilumuunngillat.
Meeqqanut isumaginninneq sipaarniarfigineqarsimasoq naalakkersuisup aamma oqaatigaa.
- Demokraatit aningaasaqarnermut naalakkersuisoqarfik tigumminikuuaat. Aningaasanut missingersuusiorsimapput, meeqqat immikkut iliuuseqarfigineqarnissaannut aningaasat sipaarniarfigalugit. Taannalu uagut ilaaffiginngilarput, Aqqaluaq B. Egede oqarpoq.
Isumaginninnermulli naalakkersuisoqarfiup meeqqanut inuusuttunullu kontoanut aningaasat immikkoortinneqartut allannguuteqarsimanngitsut aningaasanut inatsisissatut siunnersuut Randi Vestergaard Evaldsenimit saqqummiunneqartoq misissoraanni takuneqarsinnaavoq.
Aamma MIO-mut immikkoortinneqartut allannguuteqanngillat.
Aqqaluaq B. Egedep oqaatigisaminut itisiliinissaa pillugu Radioaviisip saaffiginnissutaa naalakkersuisup akinngilaa.
false
Najoqqutarisaq: 2016-imut aningaasanut inatsit
Dronning Ingdridip napparsimavissuanut 2016-imi immikkoortinneqartut nalunaarsuiffimmi qulaaniittumi takuneqarsinnaapput, 2017-imullu immikkoortinneqartut ataani takuneqarsinnaapput.
false
Najoqqutarisaq: 2017-imut aningaasanut inatsisissatut siunnersuutip siullermeerneqarnissaanut saqqummiussaq
false
Najoqqutarisaq: 2016-imut aningaasanut inatsit
Meeqqanut inuusuttunullu 2016-imi immikkoortinneqartut nalunaarsuiffimmi qulaaniittumi takuneqarsinnaapput, 2017-imullu immikkoortinneqartut ataani takuneqarsinnaapput.
false
Najoqqutarisaq: 2017-imut aningaasanut inatsisissatut siunnersuutip siullermeerneqarnissaanut saqqummiussaq
