Kukkusoqarneratigut ilinnianngitsoortoqassaaq
Tamannali pinngitsoortinneqartoq nalunaarutigineqarpoq. Qinnuteqartuni 23-ini ilinnilerusuttoq ataaseq aatsaat aappaagu qinnuteqartariaqassaaq. Sinneri iliuuseqarfigineqarsimapput. Naak Narsami Piareersarfiup piffissaq eqqorlugu qinnuteqaatit nassiunniarlugit puigorsimagaluarai qinnuteqaatit immikkut akuerineqarlutik suliarineqarsimapput.
Nuka-Emaaraq Nathansen Enoksen qinnuteqartuni ilaavoq. Taassuma qinnuteqaatini piffissarititaasoq suli piffissaritaasoq nallinngitsorli Piareersarfimmut tunniussimavaa. Tusarlerneqarsimavorlu kukkusoqarsimanera peqqutaalluni qinnuteqaataa nassiunneqarsimanngitsoq. Taamatut tusarlerneqarnini assut ajuusaarutigisimavaa.
Ippassaanili nuannersumik tusarlerneqarpoq. Tassa ilinniarfigerusutaminut tigusaasimalluni paasisimavaa.
- Ilinniarfigerusutannut akuerisaasimallunga paasigakku assut nuannaaqaanga. taamatut akuerisaanera paasillugu qamuuna assut pissatsisimaaqaanga, Nuka-Emaaraq Nathansen Enoksen nuannaaqaluni taama oqarpoq. Isumaginninnermi ikiortinngorniarluni ilinnialissamaarpoq.
Narsap piareersarfiani aqutsisoq Josef Petersenip suli pisimasoq ajuusaarutigaa. Nuannaarutigaali arlallit ilinniarnissaminnut periarfissinneqarsimammata. Kukkusoqarsimaneratalu kinguneranik ilinnialersussat ilinniarfigerusutap salliutap tullia aallartiinnartariaqarsimavaat. Tassa imaappoq assersuutigalugu ilinniarfigerusutaq pileriginerusaq normu 1-mut allanneqartarpoq, taannalu ilinniarfigerusutaq iluatsinngippat ilinniarfigerusutap pilerigisap aappaa normu 2-mut allanneqarsimasoq ilinniarfigisinnaallugu.
Ataaserli imarsiornermut ilinniarfimmut ilinnialerniarluni qinnuteqarsimagaluarpoq, iluatsissimanngilaali, ilinniarfigerusumik allamik allaqqasoqarsimannginnera pissutaalluni.
Arlallilli peqquteqavillutik ilinniarfissaraluaminnik unitsitsiinnarsimapput, ilaalu qinnuteqaatiminni amigartumik tunniussisimammata. Narsami piareersarfimmi pisortaq Josef Petersen taama nassuiaavoq.
