Kujataata nerisassaatai mamartorsuit
Nerisassiat pillugit ukiormanna pikialaartitsinissami, aggustip 24-ianit septembarip arfineq pingajuata tungaanut ingerlanneqartussami, pisussat aaqqissuussinerillu assigiinngitsut 60-init amerlanerupput.
Taamatut pikialaartitsisarnerup siunertaraa, kujataani nerisassiassat pitsassuit nittarsaanneqarnissaat, nunap immikkoortuata Kalaallit Nunaata peqqumaasiviatut saqqumilaartinnissaa, taamatullu aamma imminut nerisassiassanik pilersornerup kalaallillu nerisassiassaataannik atuinerup annertusarnissaat, aaqqissuisut oqarput.
Nunap immikkoortuani illoqarfiit tamarmik, nunaqarfiit amerlanersaat savaateqarfiillu arlallit ussigassarpassuaqartitsissapput. Nerisassiornermik immikkut ilisimasallit aamma oqalugiartinneqassapput nerisassanut, kalaallit nerisassiassaannik aallaaveqartunut, pitsaasunut peqqinnartunullu siunnersuuteqassallutik.
Sisamanngornermilu septembarip tallimaani Narsarsuarmiissagaanni, najukkami honningiliortartoq angallassisoralugu aamma alakkarterisoqarsinnaavoq.
Pikialaartitsineq Qaqortumi Torvemi arfininngorpat aallartissaaq, Borgmester Jørgen Wæver Johansen Nalakkersuisorlu Karl Lyberth pisortatigoortumik ammaassallutik. Peqatigisaanik aamma illoqarfiup kalaalimineerniarfittaava pisortatigoortumik ammaanersiorneqassaaq.
Borgmester Jørgen Wæver Johansenip oqaatigaa, inuussutissanut tunngatillugu Kujataani immikkuullarissunik periarfissaqartugut.
- Suliffeqarfiit, neriniartarfiit, savaatillit, peqatigiiffiit sullissiviillu ukiormanna pikialaartitsinissamut taama annertutigisumik suleqataasimanerat nuannaarutigaarput, borgmesteri nuannaarluni oqarpoq.
