Kujataanut takornariat ikileriarsinnaasut
Qaqortumimi 1500 meterinik takissusilimmik mittarfeqalerpat, takornariat toqqaannartumik Kujataanut angalasinnaajunnaassapput. Toqqaannartumillu angalasinnaajunnaarneq takornariat ikinnerulerneranik kinguneqassasoq, takornarialerisut ilaat isumaqarpoq.
- Kujataanut takornariarnissaq pisariunerulissaaq, Kujataani angalatitsisartup Blue Ice Explorerip pisortaa, Jacky Simoud oqarpoq.
Europamut toqqaannartumik timmisartuussisoqartarunnaassasoq
Takornariat Air Greenlandip Københavnimit Narsarsuarmut aasakkut toqqaannartumik angallaviatigoortut ukiuni kingullerni amerlanerujartorsimasut taassuma oqaatigaa.
Air Greenlandili naapertorlugu pingaarnertut mittarfik Qaqortumut nuunneqassappat, Kujataanut toqqaannartumik angallavik atorneqarunnaassagunarpoq.
- Timmisartut taama ittut mittarfimmut siunnerfigineqartumut, tassa 1.500 meterinik takissusilimmut missinnaanngillat, Air Greenlandip pisortaanera, Jakob Nitter Sørensen oqarpoq.
Tassalu takornariat Nuummi mittarfissuakkoorlutik Islandikkoorlutilluunniit Kujataanukartalissapput.
Jacky Simoudilu naapertorlugu, timmisartunut mikinernut ilaalluni Qaqortumukartoqartalissammat, Kujataanukarnissaq akisunerulissaaq tamannalu pissutigalugu takornariat ikilissallutik.
- Timmisartunut angisuunut billetit akikinnerusarnerat ilaasullu amerlanerusarnerat takornarialerinermi ilisimaneqarluarpoq. Mittarfillu angisooq maanna atorneqartoq atorunnaarsinnialerpaat, Simoud oqarpoq.
Mittarfik naannerusoq naammagiinnarneqarniarpa
Takornariat ajornannginnerusumik akikinnerusumillu Nuummut Ilulissanullu ilaatigut apuussinnaaniassammata, illoqarfinni taakkunani mittarfiit tallineqarniarput.
Kujataanili killormorluinnaq, tassa mittarfiit naannerusut siunnerfigineqartut, angalatitsisartoq isumaqarpoq.
Narsarsuarmili mittarfissuaq takornariaqarnerup ineriartorneranut pisariaqaraluarpoq.
- Mittarfissuartut atorneqarnera ingerlaannarpat, aasaanerani timmisartuussisarneq sivisusinnaaniassaaq, Blue Ice Explorerimi pisortaq Jackie Simoud oqarpoq.