Kujataani tunitsiviit sisamat matoqqasut
Aningaasat aalisartunut piniartunullu atugassanngorlugit tunniunneqartariaqaraluartut Kommune Kujallermi kommunalbestyrlse-mi ilaasortaq isumaqarpoq.
Nunaqarfinni Narsarmijini, Qassimiuni, Aappilattumi Tasiusamilu aalisartut piniartullu tunitsivissaqanngillat suliffeqarfiup Arctic Green Food-ip tunitsivii matoqqammata.
Qassimiuni tunitsivik ukiut siuliini misilittagarineqartut malillugit sumiiffik tunitsivigiuminaatsuusoq, aalisarnermut piniarnermullu Naalakersuisup Ane Hansen-ip inatsisartunut ilaasortap Juliane Henningsenip apeqquteqaataanut akissuteqarluni taamatut allappoq, aamma Qassimiuni siorna naatsorsuutigisatut tunisinissat pissarsiarineqarsimangimmata.
Narsarmijini ukiut marluk matuma siornatigut ulussaarsuarmat tunitsivik atorsinnaajunnaarluni aseruaterpoq. AGF-imit nalilerneqarsimavoq, tunisisartut annertussusaannut sanilliullugu ajoqusernerup iluarsaanneqarnissaa assut akisuujussasoq, Aalisarnermut Piniarnermullu Naalakkersuisoq Juliane Henningsen-ip apeqquteqaataanut akissuteqarluni taamatut allappoq.
Narsarmijini aalisartut aalisagartaminnik tunitsivissaqanngillat, puisit amii kisimik Pilersuisumut tunineqartarput.
Aappilattumi tunitsivik innaallagissamik imermillu pilersorneqarsinnaanngillat, Nukissiorfiit innaallagissamik pisariaqartinneqartumik pilersuisinnaanngimmat, Ane Hansen allappoq.
Kommune Kujallermi kommunalbestyrelse-mi ilaasortap Ole Mølgård Motzfeldt-i ugguaraa kiffartuussinissamut isumaqatigiissut maleruarneqanngimmat.
Tunitsiviit matoqqanerat Kommune Kujallermut sunniuteqarpoq.
Tunitsiviit matoqqanerat pissutigalugu kujataani suliffissaaleqinermik kinguneqarpoq, aalisartut piniartullu aningaasarsiorniarnerat unitsinneqarpoq, taamaalillunilu kommune-mut akileraarutitigut isertitassaagaluit annaaneqarput.
Kiffartuussinissamik isumaqatigiissut maleruarneqarsimanngippat aningaasat aalisartunut piniartunullu atorneqartariaqartut Ole Mølgård Motzfeldt isumaqarpoq.
Kiffartuussinissamut isumaqatigiissut maleruarneqarsimanngippat, aningaasat utertinneqassasut Ole Mølgård Motzfeldt isumaqarpoq , aningaasallu aalisartunut piniartunullu agguaakkaanni pitsaanerussasoq kommunalbestyrlse-mi ilaasortaq isumaqarpoq.
Arctic Green Food-ip kiffartuussinissamik isumaqatigiissut naapertuuttumik atorsimaneraa Naalakkersuisunit misissuiffigineqarpoq, tamannalu qaammatip uuma naanerani naammassineqarnissaa Naalakkersuisunit naatsorsuutigineqarpoq.