Kujataani qullugissat aalaalupput
Qallunaatsiaqarfiit Kitaani 1300-kkut ingerlaneranni inuerunnerannut
qullugissat taakku pisooqataasimasinnaasut ilisimatuut ilimagaat.
Paasissutissat Pinngortitaleriffimmeersut naapertorlugit, maajip qaammataani silap kiannera, pakkalussat qullugiaasa amerlinerannut peqqutaavoq.
Orpikkat avaalaqiat, pilullu qullugissat mamarilluagaasa ilagaat, taamaattumik orpikkat taakku pilutaarutivillugit nerineqartarnerat takornartaanngilaq. Tamannarpiarlu peqqutaalluni qallunaatsiaat nungussimanissaat ilisimatuunit ilimagineqarpoq
Pakkalussat qasertut qullugiai taakku qallunaatsiaat nalaanni aamma uumasuusimapput, aamma Nuup eqqaani nunap ikiariisitaarneranik misissuinerit takutippaat qallunaatsiaat nersutaataasa nerisaat qullugissanit aamma nerineqartarsimasut.
Qullugissat taakku qupaloraarsuit kussaallu piaraannit mamarineqarluarput.
Qullugissat taakku ukiariartulernerani pakkaluanngortarput qasertut, centimeterinillu tallimanik angissuseqalertarlutik. Pakkaluaq taanna Tunup kujataaniit Qasigiannguit tikillugit sinerissami uuumasuuvoq.