Kujataani nunaqarfinni takornariartitsinikkut periarfissat amerliartorput
Taama oqarnera savaatillup nuliata Igalikumilu niuertuusimasup Malene Egedep tigulluarpaa. Suliffeqarfiutaa aallarteqqammersoq GARDAR nunaqarfimmi takornarianut sammisassanik assigiinngitsunik neqerooruteqarluni aasaanerani takornariartitsinissamut maanna piareerpoq. Sammisassat tamakku ilaatigut tassaapput firhjulinik attartornerit, taamaalilluni nammineerluni Igalikumi alianaaqisumik angalaartoqarsinnaanngussaaq. Tamatuma saniatigut qissattaatinik assigisaannillu attartortoqarsinnaavoq, angallassisoqarluni savaateqarfinnut takornarniartoqarsinnaalluni.
Tunulliarfimmi nunaateqarfimmi Sillisini aamma ulapputtunnguaqarpoq. Tassani Elna Jensen aamma Henrik Knudsen unnuisarfimmik nutarterileruttorput illuaqqanillu allileralutik.
Unnuiffissanik neqeroorutit saniatigut Sillisiniit savaatillit allat kusanartulianik assassukkanillu tuniniaanermi suleqatigineqarput kiisalu nerisitsineq takornariartitsinerlu ataatsikkoorunneqarlutik. Takornariat immikkorluinnaq ittunik misigisassaqartinneqartarput tassa ullormut takornarniareerlutik savaatilikkunni Kujataata mamartuutaanik kiisalu naatsiianik naatsitanillu nammineq naatitanik sassaallerfigineqartaramik.
Aallarnisaasut taakku tamarmik sulianik nutaanik ineriartortitsinermut tapiissutinik qinnuteqarsimapput tunineqarsimallutillu.
Tunisassianik ineriartortitsinermut tapiissutit tassaapput sunik nutaanik tunisassiornermut inuussutissarsiutitigullu suliniutinik nutaanik ineriartortitsinermut tapiissutissatut namminersortunit qinnutigineqarsinnaasut. Tunisassianik ineriartortitsinermut tapiissutit inuussutissarsiornermut allaffinni qinnutigineqarsinnaapput kingornalu Greenland Businessimit suliarineqassallutik tapiissutigineqassallutillu.
-Kujataani nunaqarfinni takornariartitsinikkut nutaanik suliniuteqartoqalernera takullugu nuannerluinnarpoq, aammalu pilersaarutit piviusunngortinneqarnissaannut aningaasatigut tapiissutisisoqartalernera pitsaalluinnarpoq, Kalistat Lund oqarpoq.
