Kujataani isumaginninnermi kivitsiniarnermi Narsaq aallarniutaassasoq
Narsami inunnik isumaginninnikkut ajornartorsiutit Kommune Kujallermi kommunalbestyrelsimit ippassaq oqaluuserineqarput.
- Soorunami illoqarfiit nunaqarfiillu aamma ajornartorsiorput. Kisiat Narsaq aallartiffissatut immikkut iliuuseqarfigineqarnissaa siunnersuutigaarput.
Kommune Kujallermi inunnik isumagininnermut ataatsimiitsitaliap siulittaasuata, Karla Egede Bisgaardip Narsameersuusup ajornartorsiutit ulluinnarmini malugisarpai:ima eqqartorpai.
- Annertoorujussuarmik ajoraluartumik saqqumisorujussuuvoq atornerluineq. Taavalu aamma inissaaleqineq, inissaqannginneq, Karla Egede Bisgaard oqarpoq.
Taassuma imigassamik ikiaroornartumillu atornerluisoqarnera pingaartumik sammineqartinniarpaa.
- Imigassamik ikiaroornartumillu atornerluineq tassani ersarittorujussuugami Narsaq illoqarfittut isigalugu. Ingammik avataaniit tikilluni atornerluisut saqqummiunneqaramik. Inuit suliffissaaleqisuinnaangikkaluarput, kisiat nalinginnaaleraluttuinnarami, Karla Egede Bisgaard oqarpoq.
Suliffissaaleqinerup ajornartorsiutaanera qitiusorineqarpoq.
- Ukiaanerani Neqi matugaangat suliffissaaleqisut amerlisarput. Taava inuit 60-it 70-it tungaanut suliunnaaraangata ajornartorsiutit amerlanerulertaramik, kommuunimullu aningaasartuutaallutik, Monica Dorph oqarpoq.
AAMMA ATUARUK Aviisi tusaamasaq Narsamiittoq
Suliffissanik ataavartunik pilersitsioqassappat Naalakkersuisut suleqatiserineqarnissaat eqqarsaaatigineqarpoq.
-Taakkua eqqartoqaartariaqassavagut. Namminersortuusinnaapput. Qujanartumik namminersortut amerlatsikkiartorput. Kisiat aamma allat pisortat suliffeqarfii eqqartorneqartartut Narsami aamma amerlisarneqarsinnaapput, Karla Egede Bisgaard oqarpoq.
Narsamili ajornartorsiutit aamma Kommune Kujallermi tamani ajornartorsiutaammata suliniutit kujataani tamarmi ingerlanneqassapput.
- Imaangilaq Narsaq kisiat iliuuseqarfigissagipput. Qaqortumi aamma ajornartorsiorpugut, Nanortalimmi nunaqarfinnilu. Taakua tulleriiaasapput Narsaruna aallartiffissatut siunniukkipput. Monica Dorph naggasiivoq.
AAMMA ATUARUK Savaaqqat Islandimeersut Narsami suliffissaqartitsisut
AAMMA ATUARUK Naalakkersuisunut kajumissaarut: Narsaliaritsi
