Savaaqqat Islandimeersut Narsami suliffissaqartitsisut
Savaaqqammi 3000-it missaat Neqi A/S-ip toqoraavianut apuussimalersut nalunaarutigineqarpoq, tassani suliarineqassallutik nioqqutissiarineqassallutillu. Savaaqqat nioqqutissiarineqarsimasut nunatsinni niuertarfiit aqqutigalugit tuniniarneqassapput.
Savaaqqat 3000-it missaat nioqqutissiarineqarnerat qaammatini marlunni tulliuttuni suliassaqartitsissapput, Neqi A/S-illu nalunaarutigaa savaaqqat 1000-it missaat suliffissanik aqqaneq-marlunnik pilersitsisartut, savaaqqallu allat 7000-it missaat Islandimit tikisinneqarlutik ukiup massuma naanissaata tungaanut nioqqutissiarineqarsinnaasut.
Aamma atuaruk Nunap panernera Neqimut akisuvoq
- Islandimiit nioqqutissiassanik tikisitsivugut Narsami toqoraavimmi suliassaqartitsiinnarumalluta aammalu sulisut piginnaanerilersimasaat annaajumanatigit. Massakkut qanoq iliuuseqanngikkutta sulisunik angerlartitsinissaq periarfissatuaavoq, taamaassappallu fabrikki nutaaliaasoq atorneqarani matugallassalluni, Per Jensen, Neqi A/S-imi pisortaq oqarpoq.
Savaatillit toqoraavimmut tunisartagaat savaaqqat savallu ukiuni kingullerni marlunni malunnartumik ikiliartortut suliffeqarfiup nalunaarutigaa, siorna 2015-imi tunineqartut ukiup siulianut sanilliullugu 2392-inik ikinnerullutik. Pissutsillu taamaaginnarnissaat ilimagineqarpoq, nioqqutissiorsinnaassuserlu attatiinnarneqassappat uumasut 10.000-it 12.000-illu akornanni amerlassusillit amigaatigineqartartut Neqi A/S-ip tusagassiuutinut nalunaarummi allaaseraa.
