Nunap panernera Neqimut akisuvoq

Savaaqqat ukioq manna ikinnerit tunisassiarineqarmata, aningaasat tunisassiorfiup Neqip ukiumut kaaviiaartitaat, 2 millioner koruuninik ukioq manna ikileriarput.

- Tunisassiagut ikiligaluttuinnassappata, taamatullu aningaasat ikinnerit isertinneqartalissappata tamanna Neqi A/S-imut annertuumik ajortumik sunniuteqarsinnaalluarpoq, Neqi A/S-imi pisortaq, Per Jensen taama oqarpoq.

Neqi A/S-ip savaaqqat 33.000-it ukiumut tunisassiarisinnaasarpai, tassalu ukioq manna savaaqqat taamaallaat 19.938-t tunisassiarisimallugit.

Savaaqqat tunisassiarineqartut ikippallaarneri pissutigalugu, nersussuit tuttullu ukioq manna aamma tunisassiarineqarput, taamaakkaluartorli taakku iluaqutaaneri annikittuinnaavoq. Savaaqqallu 3.000-it New Zealandimiit piffissami juunimiit septembarip tungaanut aamma pisiarineqartariaqarsimapput.

Taamaaliornikkut tunisassiorfiup piffissaq sioqqullugu matuneqarnissaa pinngitsoortinneqarluni.

Neqi A/S-mit oqaatigineqarpoq, ukiuni tulliuttuni Kujataani nuna aamma panerpallaassappat aamma Kujataani savaatilinnit savaaqqat ikinnerit tunisassiarineqartassappata allatut ajornartumik New Zealandimiit savaaqqanik tikisitsisarnissaq pinngitsoortinneqarsinnaassanngitsoq.