Naalakkersuisunut kajumissaarut: Narsaliaritsi
- Narsami innuttaasut quliugaangata minnerpaamik ataaseq sulisinnaagaluarluni suliffeqarneq ajorpoq. Suliffissaaleqineq annertuvoq, isumaginninnikkut suliassat qaleriiaaginnavipput, oqaatigeqqissavarali: Kommune Kujalliup ajornartorsiutit nammineerluni aaqqiivigisinnaasimanngilai, taamaattumillu avataaniit ikiorserneqartariaqarluta, Avaaraq Olsen oqarpoq, nangillunilu:
- Sapaatip akunnera kingulleq tusaamavarput Naalakkersuisut tamarmiungajallutik Qaasuitsup Kommunia peqatigalugu Qaanaamiissimasut, aamma tamakkorpiaat eqqartuiffigalugit. Kingorna pissarsilluarsimallutik oqariartuuteqarput, tamannalu ajunngilluinnarpoq. Aamma maani Narsami periarfissat pillugit eqqartuinneqataarusoqaagut. Taamaattumik Kommune Kujallermi borgmesteri taamatullu Naalakkersuisut tamakkerlugit Narsaliaqqullugit kajumissaarusuppakka, maani innuttaasunik naapeqatiginnikkiartoqqullugit, Inuit Ataqatigiit sinnerlugit kommunalbestyrelsimi ilaasortaq oqarpoq.
Narsami inuussutissarsiornikkut periarfissat eqqartorneqarnissaat siunertaralugu suleqatigiiffinnik pilersitsisoqarnissaa, Avaaraq Olsenip siunnersuutigaa, Narsami inuussutissarsiutitigut periarfissat ineriartortinneqarpata illoqarfimmut, kommunimut Nunattalu karsianut tamanna iluaqutaaniassammat, Avaaraq Olsen oqarpoq.
