Kujataani inigisamut akiliutit tamarulliutigaat
Tamanna teknikkeqarfimmi sullissisut EDB aqqutigalugu akiliisitsiniartarneranni atortutigut kukkuluttorsimanerannik peqquteqarpoq.
Akiliivallaarsimasut utertuussapput, akiliinikippallaarsimasulli isumakkeerifigineqassapput.
Tassalu kukkuluttorneq Kommune Kujallermut aningaasarlioreeqisumut aningaasanik naleqassaaq.
Kukkuneq annertooq ukiut marluk ingerlareersut aatsaat paasineqarpoq. Kommune Kujalliup Narsami, Qaqortumi Nanortalimmilu inissiaataannik ukiuni 2010-mi 2011-imilu inimik attartortut pineqarput.
Kommune Kujallermi teknikkeqarfimmi pisortaq Jan Kjær erseqqissaassuteqarpoq.
- Tamanna qarasaasiarsornikkut kukkunerusimavoq, allaffissornikkut aningaasartuutit inissiat akiinut naleqqussarneqarsimanngimmata, Kommune Kujallermi teknikkeqarfimmi pisortaq, Jan Kjær taama oqarpoq.
Innuttaasut inigisaminnut akiliinikippallaarsimasut, isumakkeerfigineqarlutik akiliisinneqassanngillat.
Akiliivallaarsimasulli upernaap ingerlaneranni aningaasanik utertooruteqassapput.
- Innuttaasut ilaat akiliivallaarsimapput. Tamannalu kommuunip ineqarmut immikkoortortaqarfiani, allaffissornikkut kukkunerummat ineqarnermut akiliivallaarsimasut akiliivallaarutigisimasaat ineqartunut utertinneqassasut kommunalbestyrelsi ataatsimiinermini aalajangerpoq, Jan Kjær oqarpoq.
Aningaasat qasserpiaat aningaasartuutigineqarnissaat, Kommumimit suli ilisimaneqanngilaq. Kisianni ilimagineqarpoq 500.000 koruunit missaaniittut eqqartorneqartut.
- Naatsorsueqqissaarneq qanoq inerneqassanersoq massakkorpiaq oqaatigisinnaangilara. Ilimagilluinnarparalu aningaasat pineqartut katillugit 500.000 koruunit ataassimassagaat, taamaammat Kommune Kujallermi aningaasaqarnermut ataatsimiitsitaliap akuliulluni qanoq iliuuseqarnissaa pisariaqarsorinngilara, Kommune Kujallermi teknikkeqarfimmi pisortaq Jan Kjær oqarpoq.
Kommune Kujalleq 1100-it missaaniittunik inissiaateqarpoq.
Aningaasat qasserpiaat, aningaasartuutigineqassanersut , maanna kisitsinneqaleruttorput, Kommunalbestyrelsellu februaarip naanerani ataatsimiilerpat aatsaat saqqummiunneqarnissaat naatsorsuutigineqarpoq.
