Kujalleq inunnik isumaginninnermi pisortartaaqqittussanngortoq

Pisortaasartullu taarseraattuarnerat kommunalbestyrelsimi illuatungiliuttut sakkortuumik isornartorsiorpaat.

-Toqqissisimananngippallaaqaaq. Pissutsit taamaannerat akuerineqarsinnaangilluinnarpoq. Innuttaasut kikkulluunniit taamak sullinneqarneq akuerisinnaangilaat.

Inunnik isumaginninnermi ataatsimiitsitalaliami ilasortaq Inuit Ataqatigiinneersoq, Stine Egede, taama oqarpoq.

Inunnik isumaginninnermi pisortaasartut sisamassaani taarserneqarnissaat kommunemut akisoorujussuunissaata saniatigut innuttaasunut aamma sunniuteqarnerlussasoq taanna isumaqarpoq.

- Minnerunngitsumik inuit sullinneqartut eqqornerlunneqartorujussuupput uani. Uani pineqarput inuit pisariaqartitsisut ikiorneqarnissaminnik. Taakuupput eqqorneqarnerpaajusut.

Taamaammat allaffissornikkut aqutsineq aaqqiinneqartariaqartoq, taanna isumaqarpoq.

- Isumaqarpunga aatsaat aqutsinikkut equngasumik arlaannik pisoqarmat pissutsit taamaattut, Kommunalbestyrelsemi ilaasortaq oqarpoq.

Dariusz Sobczinsky Kommune Kujallermi inunnik isumaginninnermi sivikitsumik pisortaareerluni, isumaginninnermi suliassanik sullissinermi pisortanngornissani nammineerluni kissatigisimaallugu, KNR-imut erseqqissarpaa.

Taamaammat Komune Kujallermi aqutsisut akisuussaatinneqarnertik pissusissamisoorsorinngilaat.

- Inuttaata nammineq kissaatigisimagamiuk taamak appasinnerusumut atorfeqalernissani. Tamannalu qujarullugu tigusimavarput.

Inunnik isumaginninnermi ataatsimiitsitalaliami siulittaasoq Siumumeersoq, Karla Egede Bisgaard, Jørgen Semionsenimut taama oqarpoq. Jaaku Lynbberthilu atuaavoq.