Kujalleq: Suliassat 1100-t Namminersorlutik Oqartussat ikiorsiullugit suliarineqassapput
Tamakkununnga ilaallutik meeqqat inuusuttullu pillugit suliassat 260-it. Kommuunimili sumiginnaasoqarneranik suliassanik nutaanik ullut tamaasa takkussuuttoqartarpoq.
Isumaginninnermut ataatsimiititaliami siulittaasoq Karla Bisgaard, Siumut oqaluttuarpoq ingammik Narsami pissutsit ajorluinnartut.
Karla Bisgaardip 2013-imi kommunalbestyrelsimut qinigaanermi kingorna isumaginninnikkut suliassat aatsaat taama amerlatigisut takuai.
- Suliassaqaqaaq. Ukiorpaalunngortuni sulisut amingarsimapput.
Aamma atuaruk Kommune Kujalleq Naalakkersuisunut ikioqquvoq
Erngertumik ikiorneqartariaqartut
Isumaginninnermut pisortaqarfiup Qitiusumik siunnersuisoqarfia siulittaasuni siuttoralugu Narsamut apuuteqqammivoq. Isumaginninnermut siunnersortinik ilinniarsimasunik sivisuumik atorfeqartoqarsimanngilaq, Kujallermi isumaginninnermi pisortaagallartoq Peter Sonberg oqarpoq:
- Suliassat amerlasuut aallutassaapput, allallu aalajangiiffigisassaallutik.
Isumaginninnikkut suliassat 1100-t kommunip maannakkut suliarivai. Tamakkunannga meeqqanut inuusuttunullu tunngasut 264-it, taakkulu Siunnersuisoqarfiup siulliullugit suliarissagai, Peter Sonberg oqarpoq.
- Kisitsisit nutaat takkuteqqammerput. Suliassat 31-nik amerleriarsimapput, taamaattumik 300-nngulerput.
Aamma atuaruk Nakkutilliisut: Sullissinermi kukkunerit arlalissuupput
Ullut tamaasa suliassat meeqqanut tunngasut takkuttarput. Kalerriutigineqartut maanna paasiniartaratsigit. Meeqqanut tunngasut qassinngussanersut pisortaagallartup akisinnaanngilaa:
Oqaatigiuminaappoq, oqartarpugulli ilaminiinnaringaat.
Taamaattumik Namminersorlutik Oqartussat tikisitaat marluk naammanngilluinnartut Peter Sonberg isumaqarpoq.
Namminersorlutik Oqartussat ikiuinerat naammanngilaq
- Oqarsinnaavunga - Namminersorlutik Oqartussanut isumaginninnikkut siunnersortit sisamat meeqqanut tunngasunik suliaqartartut qinnutigigaluarpavut. Sulisulli marluk sapaatit akunnerini marlunni maaniittussat tikisippaat. Tamannali naammanngilluinnartoq, pisortaagallartoq oqarpoq, takorlooraluaratsigu qaammatini pingasuni sisamaniluunniit maaniissasut.
Aamma innuttaasunut isertorneqassanngilaq isumaginninnikkut pisortat arlallit kommuunip soraarsissimammagit allanngortitserisimalluni, sulilu isumaginninnikkut pisortap atorfia inuttalerneqarani. Atorfinitsitsiniarnermut tamanna sunniuteqaqataasimanersoq oqaaseqarfigerusuppallaanngilara isumaginninnermi pisortaagallartoq Peter Sonberg oqarpoq.
Aamma atuaruk Isumaginninnikkut akisussaaffiit kivissinnaanngippatigit Naalakkersuisut tigusinnaalissavaat