Nakkutilliisut: Sullissinermi kukkunerit arlalissuupput
Namminersorlutik Oqartussat nakkutilliinermik immikkoortortaqarfiani pisortap Johan Lund Olsenip suleqatinilu marluk Kommune Kujallermi isumaginnittoqarfik innuttaasunik inatsisit naapertorlugit sullissinersoq sapaatit akunnerini kingullerni arlaliusuni misissuereerlutik suliartik naammassivaat.
- Suliassat arlalissuupput, taamaattumik nuannaarutigivarput kommuni Namminersorlutik Oqartussanut ikioqqulluni saaffiginnissimammat, Ilaqutariinnermut, Naligiissitaanermut Isumaginninnermullu Naalakkersuisoqarfiup iluani nakkutilliinermik immikkoortortami pisortaq Johan Lund Olsen oqarpoq.
Aamma atuaruk Kommune Kujalleq Naalakkersuisunut ikioqquvoq
Aamma atuaruk Isumaginninnikkut akisussaaffiit kivissinnaanngippatigit Naalakkersuisut tigusinnaalissavaat
Nakkutilliisut misissuinerminni meeqqat inuusuttullu sumiginnakkat innarluutilinnullu tunngasut suliat misissorpaat. Kommunini sulisut, isumaginnittut aqutsisullu nakkutilliisunit matumani ilaatigut apersorneqarput.
Narsami, Nanortalimmi Alluitsup Paanilu allaffinni nakkutilliineq aamma ingerlanneqarpoq. Illoqarfinnilu taakkunani isumaginnittunik ilinniarsimasunik aamma sulisussaaleqipput.
- Assersuutigiinnarlugu Narsami ilinniarsimasunik isumaginninnermut siunnersorteqanngillat. Amerlanertigullu ilinniarsimasuunngitsunik sulisoqarlutik.
Sullissisutuallu piffissami sivisuumi isumaginnittoqarfimmi pisortaqarnatik erloqillutik kiffartuussisut, Johan Lund Olsen oqarpoq.
Innuttaasut ikiorneqassasut
Kujataanili innuttaasut kommunimit napertuuttumik sullinneqarnissartik maanna naatsorsuutigisinnaanngoraat, Johan Lund Olsen erseqqissaavoq.
- Sulisunik immikkut ilinniarsimasunik Namminersorlutik Oqartussat tungaaninngaanniit ikiorsiinikkut Kommune Kujallermi tamakkua suliariniarneqartussanngussapput.
Kommuni Kujallermi isumaginnittoqarfiup aaqqissuussaanera tamaat iluarsartuunneqassasoq, nakkutilliinermik immikkoortortami pisortap Johan Lund Olsenip ilanngullugu oqaatigaa.