Kommune Kujalleq Naalakkersuisunut ikioqquvoq
Namminersorlutik Oqartussat nakkutilliiartortartui Kommune Kujallermi isumaginninnermut suliaqartut suliassatik inatsisit naapertorlugit suliarineraat nakkutigiartorpaat.
Taakku sapaatit-akunnerini arlalinni nakkutilliissasut, Isumaginninnermut naalakkersuisoq Martha Lund Olsen oqarpoq.
Suliassat amerlavallaartut
Isumaginninnikkut Naalakkersuisoqarfiup nakkutilliiartortartui kommuninik nakkutilliiartorlutik aappassaa misissuiartortinneqarput. Meeqqat inuusuttuaqqallu sumiginnarneqartut kommunini inatsisit naapertorlugit sullinneqarnersut nakkutilliisut qulakkiissavaat.
Aamma atuaruk Isumaginninnikkut akisussaaffiit kivissinnaanngippatigit Naalakkersuisut tigusinnaalissavaat
Siullermik Tasiilamut nakkutilliiartorput. Aappassaanilu Kommune Kujallermut misissuiartortinneqartut, Isumaginninnermut naalakkersuisoq paasissutissiivoq.
- Nakkutilliisugut Kommune Kujallermiipput, aamma sapaatip akunnera kingulleq borgmesteri saaffiginnippoq isumaginninnermut ikiorseqqullutik suliassat amerlavallaaqimmata, naalakkersuisoq Martha Lund Olsen taama oqarpoq.
Aamma atuaruk Kujalleq Qeqqatalu: Misilittakkanik avitseqatigiinneq nukittorsaataassaaq
Nakkutilliisulli suliaasa qanoq annertutigineri maannakkut oqaatigissallugu siusippallaartoq, naalakkersuisoq erseqqissaavoq.
- Annertunerusumik ilisimanngilara massakkut qanoq ajornartorsiutit innersut, pissutigalugu aatsaat nakkutilliisugut tasamaniipput, paasissutissat suli pinngilakka. Taamaattumik taakkua pereerukkit aatsaat oqaatigisinnaassavara qanoq annertutigisumik ajornartorsiuteqarnersut. Kisianni suliaq aallartipparput oqaloqatigiillutalu aallartippugut aaqqiiviginiarlugu.
Isumaginninnermut siunnersortinik tikisitsineq
Kommune Kujalliullu isumaginnittoqarfimmini pisortassaminik atorfinitsitsiniarnermini piffisaq sivisooq atorsimavaa.
Taassumalu saniatigut illoqarfittut ikinngutigisaminik Århusip kommunianit isumaginninnermut siunnersortinik aamma tikisitsivoq. Tikisitalli Danmarkimut utereersimalerput, taamaattumik Kommune Kujallermi pisortaaneq Frank Hedegaard Jørgensen kommunimi sulisut quppersagaanni apriilip qaammataani allappoq taartaasussamik ujarlerlutik.
Kujallermi borgmesterip Jørgen Wæver Johansenip, ulluni makkunani Danmarkimiittup, Århus kommune suleqatigiinnissamik isumaqatigiissuteqarfigissallugu ullumi atsiortussaanini KNR-imut oqaatigaa.
Aamma atuaruk Kujataa meeqqat illersuisuanit tikeraarneqalersoq
Isumaqatigiissullu malitsigisaanik Århus kommunimit isumaginninnerup iluani sulisunik Kommune Kujalleq iluaquteqarsinnaammat, taassuma nuannaarutigalugu oqaatigaa.
- Kujataani isumaginninnermut sulianut aporfiusunut pisariillisaassapput, Jørgen Wæver Johansen KNR-imut oqarpoq.
Suliassanik kommunini pujoralleraluttuinnartunik, meeqqat sumiginnagaasut pillugit kommuninut nalunaarutiginninnerit kommuninit suliarineqartannginnerinik innarluutillillu sullinneqarnertik pillugu maalaartunik tusartuarnini, Martha Lund olsenip isumakulunnartipaa.
Tassungalu atatillugu oqaluttuarpoq, Namminersorlutik Oqartussani qitiusumik siunnersuisarfeqarlutik, tassanngaanniillu kommunip pisariaqartitaatigut ikorfartorneqassasoq, naatsorsuutigigini oqaatigaa.
