Kuannersuit: Innuttaasunik ataatsimiisitsinissaraluamik taamaatitsisoqaqqittoq
Kuannersuani aatsitassarsiulersaarneq pillugu innuttaasunik ataatsimiisitsinissaraluamik taamaatitsisoqaqqippoq.
Tassa imaappoq, innuttaasunik ataatsimiisitsinissani arfineq-marluusuni pingasut qatangiinnarput.
Tassa Narsami katersortarfimmi ullumi nalunaaqutaq marluniit tallimat qeqqata tungaanut ataatsimiisitsinissaraluaq taamaatippoq – unnguli ataatsimiisitsinissaq taamaatissanngitsoq aaqqissuisut ilimagaat.
Anorersuarnera peqqutaalluni taamaatippoq.
Qassiarsummi Igalikumilu arfininngormat sapaatiummallu ataatsimiisitsinissaraluit anorersuarnera aamma peqqutaalluni taamaatipput.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Minerals aatsitassarsiornissamut akuerineqassanersoq - qaqugu tamanna pissanersoq ilisimaneqanngilaq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfiit: Pinngortitaleriffik aamma Nationalt Center for Miljø og Energi, IPN-iliaq.
AAMMA ATUARUK Kuannersuit: Innuttaasunut ataatsimiititsinissat marluk taamaatiinnarneqartut
Nunatsinni innuttaasunik oqallitsitsinerni oqallisaanerpaat Kujataani ulluni makkunani pipput. Taakkua Namminersorlutik Oqartussani atorfilittanit aatsitassarsioqatigiiffimmillu Kuannersuarni aatsitassarsiulersaartumi Greenlands Mineralsimit aaqqissuussaapput.
Innuttaasunik ataatsimiisitsinerit peqqutaallutik nunatsinni partiini anginerpaami tassa Siumumi avissaartuunnerujussuaqarpoq.
Kuannersuarni ukiuni kingullerni 14-ini aatsitassarsiulersaartoqarpoq – Siumulli siulittaasortaavata siulittaasuanullu tullersortaata innuttaasunut ataatsimiisitsinissat piffissami killiligaanngitsumi taamaatinnissaat siulersuisuunernit nutaanit kissaatigineqartoq sapaatit akunnerata kingulliup siuliani nalunaarutigaat.
Aatsitassarsiulersaarnermut taama akerliusoqartiginera tusaanngitsuusaaginnarneqarsinnaanngitsoq, Siumup qullersaat isumaqarput - taamaammallu ataatsimiititsinissat maanna unitsinneqartariaqarlutik.
AAMMA ATUARUK Narsarsuarmi innuttaasoq ataatsimiititsereernermi: Quleriarlunga aperisinnaagaluarpunga
Partiip aatsitassarsiulersaarnerup allartinnissaa ukiorpassuarni sulissutigigaluarpaa.
Tamanna Siumumi Naalakkersuisunilu avissaartuuttoqapiloorneranik kinguneqarpoq – Demokraatillu ataasinngornermi naalakkersuisoqataajunnaareersullu uivernersuaqarpoq.
Innuttaasunik Narsarsuarmi tallimanngormat ataasiarluni Qaqortumilu ataasinngormat marloriarluni ataatsimiisitsisoqarpoq.
Aatsitassarsiulersaarneq pillugu tusarniaaneq avissaartuuttoqarnerani sivitsorpoq. Tassa imaappoq, innuttaasut aatsitassarsiulersaarneq pillugu juunip aallaqqaataata tungaanut tusarniaavigineqassapput. Tusarniaaneq marsip qiteqqunnerata tungaanut killeqaraluarpoq.