Kuannersuarni piiaasoqalissappat aningaasassaqassaaq
Greenland Minerals and Energyp siulersuisuunerini siulittaasoq Lars-Emil Johansen oqarpoq aningaasat amigaataasut sinneri nassaarineqassaqqaartut:
- Imaanngilaq aningaasat piareersimasuutit kisimik atorneqassasut, aningaasalersuisinnaaneermut periarfissat massakkut misissorneqarput.
Aatsitassarsiornissaq akuerineqassappat, aningaasat amigaataasut qularnanngitsumik nassaareriaannaapput, Lars-Emil Johansen oqarpoq.
Greenland Minerals and Energy, tallimanngormat tusagassiuutitigut nalunaarput 12,5 milliard koruuninik aningaasaliillutik Kuannersuarni piiaanialersaarlutik. Aningaasaqarnermut Naalakkersuisup Palle Chriatiansenip taamaaliortoqalersaarnera tupigaa, Naalakkersuisummi tamatuminnga suli nalunaarfigineqarsimanngimmata. Lars-Emil Johansenili oqarpoq Palle Christiansen pisumut paatsuuisimasoq.
- Naalakkersuisut siulittaasuat siullerpaallugu paasitinneqarpoq. Taamaattumik eqqunngilaq Naalakkersuisut paasitinneqarsimanngitsumik oqarneq. Paasissutissat pappiaranngorlugit Naalakkersuisunut ullumi nassiuttussaavakka. Aamma paasissutissat nittartakkatsinni takuneqarsinnaapput. Aamma isumaqarpunga inuttaasunut saqqummiussineq eqqumiigineqarsinnaanngitsoq, tassami innuttaasut oqallinnerisa kinguneranik, piiaanissaq aalajangiiffigineqartussaasoq, inatsisartut naalakkersuisullu siornatigut nalunaarutigereerpaat, Greenland Minerals and Energymi siulersuisuunerit siulittaasuat Lars-Emil Johansen oqarpoq.
Greenland Minerals and Energy Kuannersuarni aatsitassanik piiaalissaguni piiagaasa ilagisussaassavaat urani. Uranimillu piiaaneq 1980-ikkunnili Naalakkersuisunit ornigineqarsimanngilaq.