Kuannersuarni nalilissuarnik aatsitassaqarpoq
Kuannersuarni misissueqqaarnerup inerneri, suliffeqarfiup Greenland Minerals and Energyp nammineerluni misissugai aamma misissueqqissaartartut suliffeqarfiiniit pissarsiarisimasai pitsaasorujussuartutut neriulluarnartutullu nalunaarusiaagallartumi nalilerneqqarput.
Piiaavigineqarsinnaasup eqqaatalu nunarsuarmi nunarsuup sananeqaataani aatsitassat qaqutigoortunik peqassutsikkut annertunerpaat ilagigaat, nalunaarusiaagaallartumi allaaserineqarpoq.
Piaaffigineqartussatut siunniussami uranimik peqartoq ilisimaneqarpoq, taamaammallu satsitassat qaqutigoortut arlaat ataasiinnarluunniit piiarneqarsinnaanngilaq.
Suliffeqarfiup Greenland Minerals And Energy nalunaarusiamini naqissuserlugu ersarissarpaa Kalaallit Nunaat maannamuugallartoq aatsitassanik piiaanissamik, urani akuutillugu, akuersinngitsoq. Taamaattumik aatsitassarsiorfissap siunissaa Inatsisartut ukiaanerani ataatsimiinnerani pineqartup suliarineqarnissaa utaqqineqarpoq.
Kalaallit Nunaanni oqartussat akuersissappata kiisalu inaarutaasumik akilersinnaassutsimik misissuinerit allanngorpallaassanngippata, suliffeqarfik piareersimavoq ukiut tulleriit tallimat ingerlanerini piiaavissamik pilersitsinissaminut. Suliffeqarfik aamma aningaasaliiniarpoq, katillugit 12,5 milliard koruuninik.
Kuannersuarni aatsitassat pillugit nalunaarusiaq politikerinut nunatsinnilu tusagassiorfinnut sukumiinerusumik nassuiariartorlugu, Greenland Minerals and Energymit aallartitat allallu Nuummut marsip aallartisimalernerani tikkissapput.