Kuannersuarni aatsitassarsiorsinnaanissaq pillugu nalunaarusiaq takoqqaarusuppaat

Narsami Kuannersuarni aatsitassarsiornissaq pillugu aatsitassarsioqatigiit Greenland Minerals and Energymeersut 12,5 milliardit koruuninik aningaasaliiniarlutik ippassaq nalunaaruteqarnerat pissanganarsinnaagaluarpoq, aatsitassarsioqatigiilli tusagassiuutitigut taama nalunaaruteqarnerat Aningaasaqarnermut naalakkersuisup Palle Christiansenip tupigusuutigaa.
Allattoq Mads Lynge
februaarip 13-at 2010 17:18

Pingaartumik Naalakkersuisut tamanna pillugu sioqqullugu ilisimatinneqarsimanngimmata:

- Greenland Minerals and Energykkunnit pilersaarutigineqartut tutsuiginartutut nalilerneqassappata, taava pilersaarutit tamanna pillugu aalajangiisussanut nassiunneqassapput, tusagassiuutinut nalunaaruteqaannarnani, Palle Christiansen oqarpoq.

Misissueqqaarnerni inernerit pitsaasuunerat pissutaallutik milliardilikkaanik aningaasaliiniarlutik, Greenland Minerals and Energykkut tusagassiuutitigut nalunaarutigaat.

Aatsitassalli uranitaqarsinnaanerat ajornartorsiutaavoq, innuttaasullu tusarniarneqartariaqarput, inatsisartullu amerlanerussuteqartariaqarlutik aatsitassat qaqutigoortut uranitallillu Kuannersuarni piiarneqalissappata.

Aatsitassarsiornermulli politikki naalakkersuisunit oqilisaaviginiarneqarnersoq nalunarpoq, atorfillimi aalajangiisussallu inernerit suli pisimanngilaat.

Avatangiisinut sunniuteqaatit kingorna aatsaat nalilersorneqarsinnaapput, 12,5 milliardit koruuninilu aningaasaliiniarnerit inuiaqatigiinnut qanoq iluaqutaatigissanersut suli nalunarput, Palle Christiansen oqarpoq:

- Inernerit atuarnissaat qilaanaaraara, inuillu tamakkuninnga ilisimasaqarluartut nalileereerpata oqallittoqarnissaa neriuutigilluinnarpara, ilisimannilluartut naliliinerat tunngaviussammat, Aningaasaqarnermut naalakkersuisoq Palle Christiansen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq