VIDEO Kræftimik nappaateqarsimasup kingusippallaartukkut suliaritissimanini naammagittaalliutigigaa
Mads Peter Grønvold anaraangami aattaqartarnera paasigamiuk juunimi 2012-imi nakorsiarpoq. Nakorsallu paasivaa Mads Piitap erluani tinunermik naasoqarsimasoq.
- Nakorsap oqarfigaanga suliariteqqaarlunga iluarsissasoq, naatsorsuutigaaralu suliarittussatut allatsissimassagaannga, Mads Peter Grønvold KNR-imut oqaluttuarpoq.
Erlukkut naasoornerup piaartumik peerneqarnissaa nakorsap innersuussutigaa, Mads Peter Grønvoldili tusagaqaqqinngilaq. Kingornalu naasoornerup qaqugu peerneqarnissaa paasiniarlugu napparsimmavimmut saaffiginnittaraluarneri aamma kinguneqanngitsoorput. Tamannalu aatsaat pivoq qaammatit 22-t qaangiummata, naasoornerlu kræftinnguussimasoq tassani paasineqarpoq.
- Isumaqarpunga piaartumik suliaritissimasuuguma kræftilersimassanngikkaluarlunga, Mads Peter Grønvold oqarpoq.
Sulisut taarseraannerujussuat aporfiusartoq
Kræftip akiorniarneqarnissaanut suliniaqatigiiffik, Neriuffik, katsorsaanerup kingusippallaartukkut aallartinneqartarneranut assersuutissanik amerlasuunik takusaqartarpoq, kræftilu taamaalilluni annertusisimasinnaasarluni.
- Arlalitsigut tusartarnikuuarput, unalu nassuiaassutigineqartartoq tusartarlutigu aamma. Peqqinnissaqarfimmi sulisut, allaffissortut, aammalu nakorsat tikittartut allanngorarujussuarnerisa kingunerisaanik taamatut sullinneqartut ilaatigut sullinniarneqarnerat pikusoorsinnaasartut. Taanna aatsaat tusalinngilarput, Neriuffiup siulittaasua Sara J. Brandt taama oqarpoq.
Mads Peter Grønvold Danmarkimi uninnganermini kræftimik nappaateqartut arlallit oqaloqatigisarsimavai, Peqqinnissaqarfimmilu ajornartorsiut kisimiilluni aqqusaarsimanagu paasisimallugu.
- Inuit tamarmik naligiimmik pineqartariaqarput, aamma napparsimasunik katsorsaaneq siusinnerusukkut ingerlaavarnerusumillu pisariaqarpoq.
Sullissineq nakorsaanerup iluarisimaarpaa
Dronning Ingridip Napparsimmavissuani pisortaanerup Knud Erik Kleistip erseqqissaatigaa, Mads Peter Grønvold najukkamini napparsimmavimmut januaarimi 2014-imi saaffiginnissimammat. Qaammatip ataatsip iluani suliaritinnissamut innersuunneqarpoq marsillu qaammataani unitsinneqarpoq misissorneqareernermilu kingornalu Danmarkiliartinneqarpoq apriilillu qaammataani suliaritilluni.
Knud Erik Kleistili aamma isumaqarpoq suliaritinnissaq sukkanerusumik pisinnaasimagaluartoq, Mads Peter Grønvoldilli nassuiaatigisaatulli suliaritinnerata ingerlasimanera aamma taama ajortiginngitsoq.
- Aap, sukkanerusimasinnaagaluarpoq, Nunatsinni pissutsit pitsaanerusuuppata sapaatit akunneri arfinillit arfineq-marluk ingerlanerini, nunatta iluani angallanneq, Dronning Ingridip Napparsimmavissuani inissaqartitsineq misissortinnissamullu periarfissat, kiisalu aamma Kalaallit Nunaanni misissortereernermi napparsimasoq Danmarkimi napparsimmavissuarmit immikkut ittumit tigineqarnissaa qulakkeeqqaarneqartussaavoq.
- Suliaritereernerup kingorna, suliaritinnerlu ingerlalluarsimappat, kemomik katsorsartinneq siusinnerpaamik sapaatit-akunneri sisamat qaangiunnerisigut aatsaat aallartinneqarsinnaavoq, Dronning Ingridip Napparsimmavissuani nakorsaaneq KNR-imut taama allappoq.
