Kræfte akiorniarlugu aningaasanik katersuiniartut amerlanerupput

Nappaasuup Kræftip akiorniarneqarneranut suliuniuteqartup Kalaallit Nunaani Neriuffiit Kattuffiata nuna tamakkerlugu aningaasanik katersuniarnerani ullumi ingerlanneqartumi suleqataajumasut amerlanerupput, kattuffillu neriuppoq aningaasat 700.000 koruunit katersorneqarumaartut, Kattuffiup Neriuffiit siuliattaasua Johanne Olsen oqarpoq. Nuummi katersuiniarlutik nalunaartut 26iupput, aammalu nunaqarfinni tamangajanni katersuiniartoqarniartoq nalunaarutigineqarpoq.
Allattoq Jaaku Lyberth
oktobarip 04-at 2009 16:43

Johanne Olsenip aamma naatsorsuutigaa illoqarfinni anginerni aningaasanik katersuiniarnermi katerseqataaniartut amerlanerujumaartut.

Aningaasat katersorneqartut quppersakkanut kræfte pillugu paasisitsiniutinik arfiniliusunik qaammatip uumap naalernerani saqqummersitsinernut atorneqassapput, ilai qallunaatut kalaallisullu oqaaseqartaqartunik.

Nappammik kræftemik nappaateqartut najugarisaminnit aallarlutik Nuummut imaluunniit Danmarkimut suliaritikkiartortariaqartut ilaquttaminnik ilaqarnermikkut katsornissaat ilimanaateqarnerusartoq Johannne Olsenip oqaatigaa. Kalaallit Nunaanni Neriuffiit Kattuffiata suliniutaasa annerit ilagaat kræftemik napaateqartut pillugit siunersuiarfimmik pilersitsinissaq.

Nuna tamakkerlugu aningaasanik katersuiniarnermi katersat amerlussusii aqagu erseqqissumik paasineqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq