Kronprins Frederik coronavirusimut siullermeertumik akiuussuserneqartoq

Danskit Kunngissaat Frederik coronavirusimut marlunngornermi akiuussuserneqarpoq.

Tamanna kunngikkormiut inuit attaveqaqatigiittarfianni Instagramimi paasissutissiissutigineqarpoq.

- Ullumikkut siullermeertumik akiuussuserneqarpunga. Ulluinnarnut nalinginnaasunut uteriartoqqinnissatsinnut ikiuuttunut tamanut qujarusuppunga, inuit attaveqaqatigiittarfianni Kunngissaq Frederik allappoq.

Dronning Margrethe januaarip aallaqqaataani siullermeerluni akiuussusertippoq. Sapaatit-akunnerisa pingajussaanili aappassaani kapitilluni.

Aqaguinnanngortoq, ukiortaamut oqalugiaatimini akiuussutissat Danmarkimut tikissimaneri pillugit, nuannaarutigeqalugu oqaatigaa.

- Coronamut akiuussutissaqalernera akiuussusiisoqalereerneralu nuannaarutissaallunilu qiimmassaataavoq, dronning Margrethe oqarpoq.

AAMMA ATUARUK Dronningi juulimi nunatsinniissasoq

Dronninngip oqalugiarnermini danskit peqqinnissaqarfianni sulisunut, coronavirusip kingunerisaanik akiuulluarsimasunut, qujaniarluni aamma oqaatigaa. 

- Taakkununnga akunnerit ullullu qanoq amerlatigisut atorneqarnerinut nalilersorneqanngillat. Tuppallersaappummi. Nappaat taanna paasiniarlugu sapinngisartik tamaat ilisimatusarput, taama oqarpoq. Nuna tamakkerlugulu najugaqarfinni assigiinngitsuni sulisunut najugaqartunullu aamma qujassuteqarpoq.

Prins Christian coronavirusimik tunillatsissimasoq

Kunngikkormiuni aamma coronavirusimik tunillatsittoqaqqammerpoq, kunngissakkut angajullequtaat, prins Christian, ukioq kingulleq decembarimi coronavirusimik tunillatsimmat.

Tmanna prinsip atuarfigisaani, Tranegårdskolenimi Helleruppimiittumi, pivoq.

Kingunerisaanik angajoqqaani qatanngutinilu peqatigalugit Amalienborgimi mattusimavoq.

Kunngissakkut qitornaalu nukarliit pingasut kingusinnerusukkut misissorneqaramik tunillatsissimanngillat.

Prins Christian apersorteqqammerpoq, tamanna coronap ajornartoortitsinerata kingunerisaanik ukioq mannamut kinguartinneqarmat.

Nalliuttorsiornissarsuilli pinngitsoorput, ilaqutaammi nunamit allaneersut coronavirusi pinngitsoortinniarlugu killilersuinerujussuup kingunerisaanik tikeraanngitsoormata.

Ilaatigut prins Joachim prinsesselu Marie, Parisimi najugaqartut, aamma aataava, John Donaldson, Englandimi najugaqartoq, ajaavilu Australiami najugaqartut. Tamanna uggorineqaqaaq.

- Allatummi ajornaqaaq. Uumatitsinniitippagut eqqarsaatigalugillu, prins Christian oqarpoq.